ޗައިނާއިން އިންޑިއާއަށް ދަތިކުރުމަށް އައު މައިދާނެއްގައި ހަމަނުޖެހުން ހިންގަން ފަށައިފިކަމަށް ނިއުދިއްލީން ތުހުމަތުކޮށްފިއެވެ. އިންޑިއާއިން ބުނާ ގޮތުގައި މިޔަންމާރގައި ޓެރަރިސްޓް ޖަމާއަތްތަކެއް ކަމަށް މިއަހަރު ކަނޑައަޅާފައިވާ ހަތިޔާރު އެޅި ޖަމާއަތްތައް ބޭނުންކޮށްގެން ޗައިނާއިން އިންޑިއާއާއި މިޔަންމާރގެ ސަރަހައްދުގައި ހަމަނުޖެހުން އުފައްދުމަށް މަސައްކަތް ފަށައިފިއެވެ. އިންޑިއާގެ އިރުއުތުރު ސަރަހައްދުގައި ހަތިޔާރު އެޅި ޖަމާއަތްތަކުން ހަނގުރާމަވެރި ހަމަލާތައް ދީހަދައެވެ. މިމީހުން ޕްރޮކްސީންގެ ގޮތުގައި ބޭނުންކޮށްގެން މިމީހުންނަށް ޗައިނާއިން ވާގިވެރިވާ ކަމަށް ނަންހާމަ ނުކުރުމަށް އެދި މިކަމުގެ މައްލޫމާތު ލިބިފައި ހުރި ފަރާތަކުން ބްލޫމްބަރގްއާ ވާހަކަ ދެއްކެވިއެވެ.
ޗައިނާގެ ކުންމިންގއަށް އިންޑިއާގެ ހަނގުރާމަވެރި ޖަމާއަތްތަކުގެ ލީޑަރުން އޮކްޓޯބަރުގެ މެދުތެރޭގައި ވަދެ ހަނގުރާމައިގެ ތަމްރީންތަކުގައި ބައިވެރިވެފައިވާ ކަމުގެ މައްލޫމާތު އިންޑިއާގެ ބޮޑު ވަޒީރު ނަރެންދްރަ މޮދީގެ ސަރުކާރަށް ދީފައިވާ ކަމަށް ބުނެއެވެ. އިންޑިއާގެ މަސްއޫލުވެރިން ވިދާޅުވާ ގޮތުގައި މިކަމަކީ ފުޅާދާއިރެއްގައި ހިނގާ ކަމެއްކަމަށާއި ކުރީގެ އަސްކަރީ މަސްއޫލުވެރިން މިމީހުންނާ ބައްދަލުކޮށް ހަދާފައިވެއެވެ.
އިންޑިއާގެ 14 ހާސް ކިލޯމީޓަރުގެ ބޯޑަރުގައި އިތުރު ސިފައިންތަކެއް ބައިއިއްބުމުން ފިއްތުންތަކެއް ކުރިމަވެފައިވާ ކަމަށްވެސް މަސްއޫލުވެރިން ދެކެވަޑައިގަންނަވައެވެ. އޮކްޓޯބަރު 21ގައި އިންޑިއާ މިޔަންމާރގެ ބޯޑަރުގައި ސިފައިންގެ މީހަކު މަރާލުމާ ގުޅިގެން އެއްހާސް ސިފައިން ހިމެނޭ ފައުޖުގެ އެތައް ފައުޖެއް އިންޑިއާއިން މި ސަރަހައްދަށް ފޮނުވާފައިވާ ކަމަށްވެސް ވެއެވެ.
އިންޑިއާގެ ހަނގުރާމަވެރި ޖަމާއަތްތަކަށް ޗައިނާއިން ވާގިވެރިވާ ކަމުގެ ވާހަކަތައް ޗައިނާއިން ވަނީ ދޮގުކޮށްފައެވެ. ބްލޫމްބާގަށް ލިޔުމުން ޗައިނާއިން ދީފައިވާ ޖަވާމުގައި ބުނެފައިވަނީ އަބަދުވެސް ހަތިޔާރު އެކްޕޯޓް ކުރުމަށް ޗައިނާއިން ޙިކުމަތްތެރި ސިޔާސަތެއް ގެންގުޅެފައވާނެ ކަމަށެވެ. އަދި ހަތިޔާރު އެޅި ޖަމާއަތްތަކަށް ޗައިނާއިން ހަތިޔާރު ނުވިއްކާ ކަމަށާއި ޗައިނާއިން ހަތިޔާރު ވިއްކަނީ ސަރުކާރަށް ކަމަށް ބުނެފައި ވެއެވެ.
އިންޑިއާ ސިފައިންނާއި މިޔަންމާރ ސިފައިން ގުޅިގެން ޓެރަރިސްޓް ޖަމާއަތްތަކާ ދެކޮޅަށް ބޯޑަރުގައި އޮޕަރޭޝަނެއް ހިންގާފައި ވެއެވެ. އަދި އިންޑިއާ ސިފައިންގެ ވެރިޔާ ވަނީ ނޮވެމްބަރު 24 ގައި ނާގާލޭންޑަށް 3 ދުވަހުގެ ދަތުރެއްވެސް ކުރައްވާފައެވެ.
