ނޭޓޯއިން ދަނީ އޮސްޓްރޭލިއާއި ޖަޕާނާއި ދެކުނު ކޮރެއާއާއި ގުޅުން ބަދަހިކޮށް، ޗައިނާއިން ކުރިމަތިވާ ސަލާމަތީ ގޮންޖެހުންތަކާ ކުރިމަތިލުމަށް ތައްޔާރު ވަމުންނެވެ. ނޭޓޯގެ ސެކެޓްރީ ޖެނެރަލް ޖެންސް ސްޓޯލްޓެންބަރގް ވިދާޅުވީ އެއްގައުމަކަށް އެކަނި ޗައިނާއާ ކުރިމައްޗެއް ނުލެވޭނެ ކަމަށެވެ.
ޕޮލިޓިކޯއިން އިންތިޒާމު ކުރި ވަރޗުއަލް ބައްދަލުވުމެއްގައި ވާހަކަ ދައްކަވަމުން ސްޓޯލްޓެންބަރގް ވިދާޅުވީ ނޭޓޯ ވުޖޫދަށް އައީ ޑިމޮކްރެޓިކް އަގުތައް ނެގެހެއްޓުމަށެވެ. ޗައިނާއަކީ ޑިމޮކްރެޓިކް ހަމަތައް ގަބޫލުކުރާ ގައުމެއް ނޫން ކަމަށް އޭނާ ވިދާޅުވިއެވެ. އަދި ޗައިނާއިން ގެންގުޅޭ ޚުދު މުޚުތާރު ގޮތްތައް ފެންނަނީ ހޮންގކޮންގ ގެ މައްސަލާގައާއި ބައިމަދު މީހުންނާ މެދު ޗައިނާއިން މުއާމަލާތު ކުރާ ގޮތުން ކަމަށްވެސް އޭނާ ވިދާޅުވިއެވެ. އޭނާ އެ އިޝާރާތް ކުރެއްވީ ޝިންޖިއާންގައި މުސްލިމުންނަށް ޗައިނާއިން ކުރަމުންދާ ދުއްތުރާތަކަށެވެ.
ނޭޓޯއަކީ ދެވަނަ ބޮޑު ހަނގުރާމައަށް ފަހު ރޫސީވިލާތާއި ކުރިމަތިލުމަށާއި ޔޫރަޕްގެ ސަލާމަތާއި ރައްކާތެރިކަމަށް އުފައްދާފައިވާ ޖަމާއަތެކެވެ.
ނޭޓޯއިން ވަނީ 2030ގެ މާރެސް ހާމަކޮށްފައެވެ. މީގައި ވާގޮތުން ޗައިނާއިން ކުރިމަތިވާ ގޮންޖެހުންތަކާ ކުރިމަތިލުމަށް ނޭޓޯއަށް އިތުރު ރިސޯސް ބޭނުންވެއެވެ. ސްޓޯލްޓެންބަރގް ވިދާޅުވިގޮތުގައި ނޭޓޯއިން އެ ޖަމާއަތް އުފައްދާފައިވާ މަގްސަދުތައް ނަގަހައްޓާނެއެވެ. އެއީ މިނިވަންކަމާއި ގާނޫނުގެ ވެރިކަމާއި ޑިމޮކްރެސީގެ އުސޫލުތަކެވެ.
ގުޅުން ހުރި ލިޔުންތައް:
ޗައިނާއަށް ފާރަވެރިވާން ނޭޓޯގެ މެންބަރުން ހޭލާން ވެއްޖެ
އަރކްޓިކް ސަރަހައްދުގައި ޗައިނާ
ޗައިނާ ބާރުގަދަ ވެގެން ދިއުމުން މިހާރުގެ ސަމާލަތީ މާހައުލު މުޅިން ބަދަލުވެފައިވާ ކަމަށް އޭނާ ވިދާޅުވިއެވެ. އަދި ޑިފެންސްގެ ދާއިރާއާއި ނިއުކްލިއަރ ހަތިޔާރާއި މިސައިލްއާއި އޮޅުވާލުމަށް މަޢްލޫމާތު ފެތުރުމުގެ ދާއިރާގައި ޗައިނާއިން ގެންގުޅޭ ޓެކްނޮލޮޖީއިން ނޭޓޯގެ މެންބަރުންނަށް ގޮންޖެހުންތަކާ ކުރިމަތިވެފައިވާ ކަމަށްވެސް އޭނާ ވިދާޅުވިއެވެ.
ވަކި އެއްގައުމަކަށް ޗައިނާއާ ކުރިމަތި ނުލެވޭނެ ކަމަށް ވިދާޅުވަމުން އޭނާ ހާމަކުރެއްވީ، ޗައިނާގެ ބޮޑުކަމާއި އިގްތިސާދާއި އަސްކަރީ ބާރުވެރިކަމާއި ޓެކްނޮލޮޖީގައި އެމީހުން ހޯދާފައިވާ ކާމިޔާބީން ޗައިނާ ވަނީ ބޮޑުވެގެން ގޮސްފައެވެ. އެހެންވެ އެންމެން ގުޅިގެން ޗައިނާއާ ކުރިމަތިލާން ބޭނުންވާ ކަމުގައި އޭނާ ވިދާޅުވިއެވެ.
