އާންމު ރައްޔިތުންގެ މެދުގައި ހުރި ދީނީ އަދި އިޖުތިމާއީ މައްސަލަތައް ހައްލުކުރުމަށް، އޯގާކޭމްޕުގެ ހަރަކާތްތައް އދ. އަތޮޅުގެ ދެ ރަށެއްގައި ކުރިއަށްގެންގޮސްފިއެވެ. މިއީ ދިވެހި ފުލުހުންގެ ޚިދުމަތާއި މިނިސްޓްރީ އޮފް އިސްލާމިކް އެފެއާޒް ގުޅިގެން ކުރިއަށް ގެންދިޔަ ކޭމްޕެކެވެ.
ފުލުހުން ވިދާޅުވީ މި ކޭމްޕަކީ މި ޖަނަވަރީ މަހުގެ 14 އިން 19 އަށް ކުރިއަށް ދިޔަ ހަރަކާތްތަކެއް ކަމަށެވެ. މި ހަރަކާތްތައް ކުރިއަށް ގެންގޮސްފައިވަނީ އދ. އޮމަދުއާއި މަހިބަދޫ ގައެވެ.
މި ކޭމްޕުގައި، އެ ރަށްރަށުގެ މުއައްސަސާތަކުގެ މުވައްޒަފުންނާއި ސްކޫލް ދަރިވަރުންނާއި މުދައްރިސުންނާއި ބެލެނިވެރިން އަދި ރަށުގެ ޖަމުއިއްޔާތަކާއި ރައްޔިތުންނަށް މައުލޫމާތު ދިނުމަށް ސެމިނާތަކާއި ސެޝަންތައް ކުރިއަށް ގެންގޮސްފައިވާ ކަމަށް ފުލުހުން ވަނީ ވިދާޅުވިއެވެ.
އަދި ދީނީ ކައުންސިލިންގ ބޭނުންވާ މީހުންނަށް ކައުންސިލިން ދިނުމާއި މިސްކިތްތަކުގައި ދީނީ ދަރުސް ދިނުމުގެ އިތުރުން ދީނި ގޮތުން މައުލޫމާތު އޮޅުން ފިލުވަން ބޭނުންވާ މީހުންނަށް އެފުރުސަތު ފަހިކޮށްދީފައިވާކަމަށާއި މި ކޭމްޕުގައި މައުލޫމާތު ދެއްވީ އައްޝައިޚް އަޙްމަދު މަޢުމޫން ކަމަށްވެސް ފުލުހުންވަނީ ވިދާޅުވެފައެވެ.
މި ކޭމްޕްގައި ހިންގަނީ ރަށްރަށުގައި ހުރި ދީނީ މައްސަލަތައް ދެނެގަތުމާއި ރައްޔިތުންނަށް ދީނީ މައުލޫމާތު ފޯރުކޮށްދީ ހޭލުންތެރިކުރުމުގެ އިތުރުން ދީނީނަސޭހަތާއި ދަރުސް ދިނުމަށެވެ. މިގޮތުން މިދިޔަ އަހަރުގެ އޮގަސްޓް މަހު މި ކޭމްޕު، އދ. މާމިގިލި އަދި ފެންފުށީގައިވެސް ކުރިއަށްގެންގޮސްފައިވެއެވެ.
