ފީފާ ކްލަބް ވަރލްޑް ކަޕުގައި ވާދަކުރުމަށް މޮރޮކޯއަށް އައީ މުބާރާތުގައި ބައިވެރިވެލާ ޓީމެއްގެ ގޮތުގައި ނޫން ކަމަށާއި ބޭނުން ވަނީ ފައިނަލުގައި މިރޭ ޔޫރަޕުގެ ޗެމްޕިއަން، މަޝްހޫރު ރެއާލް މެޑްރިޑް ބަލިކޮށް ތަށި ސައުދީ އަރަބިއްޔާއަށް ގެންދަން ކަމަށް އަލް ހިލާލް ފުޓްބޯޅަ ޓީމުގެ ކޯޗް ރާމޮން ޑިއަޒް ބުނެފިއެވެ.
މަޝްހޫރު ޑިއޭގޯ މަރަޑޯނާއާއެކު 1979 ވަނަ އަހަރު، ފީފާ ވިހި އަހަރުން ދަށުގެ ވަރލްޑް ކަޕް އާޖެންޓީނާއަށް ކާމިޔާބު ކޮށްދިނުމަށް ފޯވާޑް ލައިނުގައި މުހިއްމު ދައުރެއް އަދާކޮށް މުބާރާތުގެ ރަންބޫޓް ހޯދި ޑިއަޒް ބުނީ މީގެ 26 އަހަރު ކުރިންވެސް އިންޓަ ކޮންޓިނެންޓަލް ތައްޓެއް ކާމިޔާބު ކުރަން އުއްމީދު ކުރެވުނު ކަމަށާއި މިފަހަރު އޭގެ ބަދަލު ބޭނުންވާ ކަމަށެވެ. އެކަމަކު އެފަހަރު އިޓަލީގެ ޔުވެންޓަސް އަތުން ޑިއަޒްގެ ރިވަޕްލޭޓް ބަލިވީއެވެ.
"ފްލެމިންގޯ (ދެކުނު އެމެރިކާގެ ޗެމްޕިއަން) އާ ދެކޮޅަށް ސެމީފައިނަލުގައި އަހަރެމެން ދެއްކީ އަހަރެމެން މިތަނަށް މުބާރާތުގައި ވާދަކުރުމަށް މިއައީ ހަމައެކަނި މުބާރާތުގައި ވާދަކޮށްލާ އުސޫލަކުން ނޭނުނޭ. ފްލެމިންގޯއަށް ހައިރާންކަން ލިބޭނެ ހިލާލް ކުޅުންތެރިންގެ ހުނަރާއި ކުޅުން ފެނިފައި. މުޅި މެޗް ޑޮމިނޭޓް ކުރީ އަހަރެމެން. ފައިނަލުން ފުރުސަތު ހޯދީ ހައްގު މޮޅެއް ހޯދައިގެން" 1982 ގެ ވަރލްޑް ކަޕުގައި ބްރެޒިލް ކޮޅަށް ލަނޑުވެސް ޖެހި ކުރީގެ ފޯވާޑް ޑިއަޒް ބުންޏެވެ.
ފައިނަލުގައި ހިލާލް ވާދަ ކުރަންޖެހޭ ރެއާލްއަކީ ކްލަބު ވަރލްޑް ކަޕުގެ އެންމެ ކާމިޔާބު ޓީމެވެ. ރެއާލްއިން ވަނީ މިހާތަނަށް 4 ފަހަރު މިމުބާރާތް ކާމިޔާބު ކޮށްފައެވެ.
ޑިއަޒް ބުނީ އޭނާގެ އިހްތިރާމް އަބަދުވެސް ރެއާލްއަށް އޮންނާނެ ކަމަށާއި ރެއާލްގައި އޮތީ ކާމިޔާބު ދިގު މާޒީއެއް ކަމަށެވެ. އެކަމަކު އެއީ ފައިނަލުގައި އަލް ހިލާލުން ކުޅޭއިރު ވިސްނާނެ ކަމެއް ނޫން ކަމަށް ޑިއަޒް ބުންޏެވެ. "އަހަރެމެންނަކީ އޭޝިޔާގެ އެންމެ ބޮޑު ޓީމު. ރެއާލްއަކީ ޔޫރަޕުގެ އެންމެ ބޮޑު ޓީމު. އަހަރެންގެ ކުޅުންތެރިންގެ ހުނަރަށް ބަލާއިރު ރެއާލް ބަލިކުރެވިދާނެ ކަމަށް ގަބޫލް ކުރަން" ޕެރަގުއޭ ގައުމީ ޓީމަށްވެސް އިރުޝާދު ދީފައިވާ ކާމިޔާބު ކޯޗް ޑިއަޒް ބުންޏެވެ.
ޑިއަޒް ބުނީ ސައުދީ އަރަބިއްޔާގެ ފުޓްބޯޅަ ވަރަށް ބޮޑަށް ބަދަލުވެއްޖެ ކަމަށާއި މިހާރު ފެންނަމުންދާ މަންޒަރަކީ 2016 ވަނަ އަހަރު ޕްރިންސް މުހައްމަދު ބިން ސަލްމާން 2027 ވަނަ އަހަރަށް އިއުލާން ކުރެއްވި ތަސައްވުރު ކަމަށެވެ. ސައުދީގެ ފުޓްބޯޅައިގެ ހާލަތު ބަދަލު ކުރުމަށް ޝާހީ އާއިލާގެ ހާއްސަ ހުއްދަޔާއެކު ކުޅިވަރާ ބެހޭ ވުޒާރާއިން ގެންދަނީ ފާހަގަ ކޮށްލެވޭފަދަ މަސައްކަތްތަކެއް ކުރަމުންނެވެ. ކުރިއަށް އޮތް އޭޝިޔަން ކަޕުގެ ބިޑް ސައުދީއިން ކާމިޔާބު ކޮށްފައިވާއިރު މިހާރު އެގައުމުގެ އަމާޒު ހުރީ 2030 ވަނަ އަހަރުގެ ވަރލްޑް ކަޕް ބިޑް ކާމިޔާބު ކުރުމަށެވެ.
ކްލަބް ވަރލްޑް ކަޕް ފައިނަލް މެޗް: އަލް ހިލާލް - ރެއާލް މެޑްރިޑް ، މިރޭ (ދަންވަރު 0:00)
ކްލަބް ވަރލްޑް ކަޕް ތިންވަނަ ހޮވާ މެޗް: އަލް އަހްލީ - ފްލެމިންގޯ ، މިރޭ (20:00)
