ފީފާ ކްލަބު ވަރލްޑް ކަޕުގެ ފައިނަލުގައި އޭޝިޔާގެ ޗެމްޕިއަން، ސައުދީގެ އަލް ހިލާލް 3-5 އިން ބަލިކޮށް މަޝްހޫރު ރެއާލް މެޑްރިޑުން ރޭ ޗެމްޕިއަންކަން ހޯދައިފިއެވެ.
މޮރޮކޯގެ ޕްރިންސް މޯލޭ އަބްދުﷲ ސްޓޭޑިއަމްގައި ކުޅުނު މިމެޗުގެ ފުރަތަމަ ހާފް ނިމިގެންދިޔައީ 2-1 އިން ރެއާލް ކުރީގައި އޮވެގެންނެވެ. ރެއާލްގެ ދެލަނޑު ކާމިޔާބު ކޮށްދިނީ ވިނީޝިއަސް އާއި ވަލްވޭޑޭއެވެ. ހިލާލްގެ ހަމައެކަނި ލަނޑު ކާމިޔާބު ކޮށްދިނީ ޕޯޓޯއަށް ކުރިން ކުޅުނު ފޯވާޑް މާލީގެ މޫސާ މަރޭގާއެވެ.
ކްލަބް ވަރލްޑް ކަޕުގެ ޗެމްޕިއަންކަން ހޯދާ އޭޝިޔާގެ ފުރަތަމަ ގައުމުގެ ޝަރަފް ހޯދުމުގެ އަޒުމުގައި ނިކުތް ހިލާލް އުއްމީދުތައް ފަނޑުވެގެންދިޔައީ ދެވަނަ ހާފުގެ ކުރީކޮޅު ކެޕްޓަން ކަރީމް ބެންޒީމާ އާއި ވަލްވާޑޭގެ ލަނޑުން ލީޑް ފުޅާ ކުރުމުންނެވެ. ރެއާލްގެ ފަސްވަނަ ލަނޑު ޖަހައިދިނީ ވިނީޝިއަސްއެވެ. ހިލާލްއަށް ފަރަގު ކޮށްދިނީ ކުރިން ފުލަމްއަށް ކުޅުނު ފޯވާޑް ވިއެއްޓޯގެ ދެލަނޑުންނެވެ.
ހިލާލް ފައިނަލުން ބަލިވެގެންދިޔަނަމަވެސް، އެޓީމް ވެގެން ގޮސްފައި ވަނީ ސައުދީގެ ކްލަބުތަކުގެ ތެރެއިން ކްލަބް ވަރލްޑް ކަޕުގެ ފައިނަލުން ޖާގަ ހޯދި ފުރަތަމަ ކްލަބަށެވެ. ފައިނަލުން ހިލާލް ޖާގަ ހޯދީ ސެމީގައި ދެކުނު އެމެރިކާގެ ޗެމްޕިއަން ބްރެޒިލްގެ ފްލެމިންގޯ ބަލިކޮށްފައެވެ.
އަނެއްކޮޅުން މިއީ ރެއާލްއިން ކްލަބް ވަރލްޑް ކަޕް ތަށި ކާމިޔާބު ކުރި 5 ވަނަ ފަހަރެވެ. މީގެ ކުރިން ރެއާލްއިން ކްލަބް ވަރލްޑް ކަޕް ކާމިޔާބު ކޮށްފައި ވަނީ 2014، 2016 ،2017 ،2018 ގައެވެ. ރެއާލްގެ މިކާމިޔާބީއާއެކު އެންމެ ހާއްސަ އުފަލެއް ލިބުނީ ކެޕްޓަން ބެންޒީމާއަށެވެ. މިތައްޓާއެކު އޭނާ ވެފައި ވަނީ ރެއާލްއާއެކު އެންމެ ގިނަ ތަށި ކާމިޔާބު ކުރި ކުޅުންތެރިޔާ ކަމުގައެވެ. އެއީ 25 ތަށްޓެވެ.
ފީފާއިން މިހާރު ނިންމާފައި ވަނީ 2025 ވަނަ އަހަރުން ފެށިގެން ކްލަބް ވަރލްޑް ކަޕް އެހެން ފޯމެޓެއްގައި ކުރިއަށް ގެންދާށެވެ. އެއީ 32 ކްލަބު ބައިވެރިކޮށްގެން ކޮންމެ 4 އަހަރުން އެއްއަހަރު މުބާރާތް ކުރިއަށް ގެންދާ ގޮތަށެވެ.
