އިނގިރޭސި ޕްރިމިއަރ ލީގުގައި ރޭ އާސެނަލް 1-3 އިން ބަލިކޮށް، ޗެމްޕިއަން މެންޗެސްޓަރ ސިޓީ ތާވަލުގެ އެއްވަނައަށް ޖެހިލައިފިއެވެ.
އާސެނަލްގެ އެމިރޭޓްސް ސްޓޭޑިއަމްގައި ކުޅުނު މިމެޗުގައި ފުރަތަމަ ލަނޑު ޖަހައި ލީޑްނެގީވެސް މެންޗެސްޓަރ ސިޓީއިންނެވެ. މިލަނޑު މެޗުގެ 24 ވަނަ މިނެޓުގައި ކާމިޔާބު ކޮށްދިނީ ކެވިން ޑިބްރޭނާއެވެ. ޑިބްރޭނާ މިލަނޑު ޖެހީ އޭރިޔާގެ ބޭރުން އަރިމަތިން އާސެނަލްގެ ޑިފެންޑަރު ޓޮމިޔަސޫ، ކީޕަރަށް ދޭން އުޅުނު ޕާހެއް ހޯދައި ކީޕަރުގެ ބޯމަތިން ގޯލުގެ ތެރެއަށް ފޮނުވާލައިގެންނެވެ. އެކަމަކު ފުރަތަމަ ހާފް ނިމުމުގެ ކުރިން ލިބުނު ޕެނަލްޓީއަކުން ސަކާ، އާސެނަލްއަށް އެއްވަރު ކޮށްދިނެވެ.
ދެވަނަ ހާފުގެ ބޮޑުބައި ދެޓީމު 1-1 އިން އެއްވަރުވެފައި ވަނިކޮށް ސިޓީއިން ދެވަނަ ފަހަރަށް މެޗުގައި ލީޑް ނެގީ 72 ވަނަ މިނެޓުގައި ޖެކް ގްރީލީޝް ކާމިޔާބު ކުރި ލަނޑުންނެވެ. މިއީ ފޯވާޑް އާރްލިންގ ހާލަންޑް ތަނަވަސްކޮށްދިން ފުރުސަތަކުން ޖެހި ލަނޑެކެވެ. އޭގެ ދިހަ މިނެޓްފަހުން ޑިބްރޭނާ ތަނަވަސްކޮށްދިން ފުރުސަތަކުން ހާލަންޑް ލަނޑެއްޖަހައި ސިޓީގެ ލީޑް އިތުރަށް ފުޅާކޮށްދިނެވެ.
މިބައްޔަކީ ޕްރިމިއަރ ލީގުގައި ޖެހިޖެހިގެން ސިޓީއަތުން އާސެނަލްވި 11 ވަނަ ބައްޔެވެ. އަނެއްކޮޅުން ބަލާއިރު ލީގުގައި ބުދަ ދުވަހު ކުޅެގެން ސިޓީ ޖެހިޖެހިގެން މޮޅުވި މިއީ 23 ވަނަ މެޗެވެ. މިއީ ލީގުގެ ރެކޯޑެކެވެ.
އާސެނަލްއަށްވުރެ އިތުރަށް އެއްމެޗް ކުޅެފައިވާ ސިޓީއަށް ތާވަލުގެ ކުރި ލިބެނީ ޕޮއިންޓުގެ ގޮތުން އާސެނަލްއާ އެއްވަރުވެ ލަނޑުގެ ތަފާތުން ސިޓީއަށް ކުރި ލިބޭތީއެވެ. ސިޓީއަށް 23 މެޗުން އަދި އާސެނަލްއަށް 22 ލިބިފައި އޮތީ 51 ޕޮއިންޓެވެ. ސިޓީއަށް ފައިދާ ލަނޑުގެ ގޮތުގައި 36 ލަނޑު އޮތްއިރު، އާސެނަލްއަށް ފައިދާ އޮތީ 26 ލަނޑެވެ. ލީގުގެ ތިންވަނައިގައި 46 ޕޮއިންޓާއެކު އޮތީ މެންޗެސްޓަރ ޔުނައިޓެޑެވެ. ހަތަރުވަނައިގައި ނިއުކާސަލް އޮތީ 41 ޕޮއިންޓާއެކުއެވެ.
