ޔުރޮޕާ ލީގް ކޮލިފިކޭޝަނުގެ ފުރަތަމަ ލެގުގައި މިރޭ ބާސެލޯނާއާ ދެކޮޅަށް ކުޅެން ޖެހޭ މެޗަކީ މެންޗެސްޓަރ ޔުނައިޓެޑުގެ ކުޅުންތެރިން ފާއިތުވެދިޔަ ދުވަސްތަކުގައި ހޯދި ކުރިއެރުންތައް ވަޒަން ކޮށްލަން ލިބޭ ރަނުގެ ފުރުސަތެއް ކަމަށް އެކްލަބުގެ ކޯޗް އެރިކް ޓެން ހާގް ބުނެފިއެވެ.
ޓެން ހާގް ބުނީ މައްސަލަތަކުން އަރައިގަނެ ބާސެލޯނާ އާއި މެންޗެސްޓަރ ޔުނައިޓެޑްވެސް ދަތުރު ކުރަމުން ދަނީ ރަނގަޅު މިސްރާބަށް ކަމަށް ގަބޫލް ކުރާ ކަމަށެވެ. "މިދިޔަ ދުވަސްތަކުގައި ކުރެވުނު މަސައްކަތުން އާދެވިފައި މިހުރި ހިސާބު ވަޒަން ކޮށްލަން ރަނގަޅު ފުރުސަތެއް މިއީ. ބުނެވިދާނެ އަހަރެމެންނަށްވުރެ ފޯމުގައޭ ބާސެލޯނާ އޮތީ. އެމީހުން ވަރަށް މޮޅު ޑިފެންސް ކުރަން. އަދި 90 މިނެޓް އެއްލެވެލްގައި ޓެކްޓިކަލީ ވަރަށް މޮޅަށް ކުޅޭ. ޔޯހާން ކްރައިފްގެ ފިލޯސޮފީއާ އެއްގޮތަށް ބާސެލޯނާގެ ގޭމް އެތުރިފައި އޮތީ. ބާސެލޯނާއިން ބޭނުންވާނެ ގިނަވަގުތު ބޯޅަ ހިފަހައްޓައިގެން ކުޅެން" ޓެން ހާގް ބުންޏެވެ.
ބާސެލޯނާއާ ދެކޮޅަށް ނުކުންނައިރު ޔުނައިޓެޑް އޮތީ ވަރަށް ފޯމުގައެވެ. އެންމެފަހުން ޔުނައިޓެޑް ކުޅުނު 15 މެޗުގެ ތެރެއިން އެޓީމުން ވަނީ 12 މެޗް ކާމިޔާބު ކޮށްފައެވެ. ބަލިވީ އެންމެ މެޗަކުންނެވެ. ބާސެލޯނާއަށް ބަލާއިރު އެޓީމުވެސް އޮތީ ވަރަށް ފޯމުގައެވެ. އެންމެފަހުން ކުޅުނު 15 މެޗުގެ ތެރެއިން 14 މެޗް ބާސާއިން ވަނީ ކާމިޔާބު ކޮށްފައެވެ. އަދި ލީގް ތާވަލުގެ ކުރީގައި ޗެމްޕިއަން ރެއާލް މެޑްރިޑުގެ މައްޗަށް 8 ޕޮއިންޓުގެ ލީޑެއްވެސް ބާސާއިން ވަނީ ނަގާފައެވެ.
އަނިޔާގެ ސަބަބުން ބާސާއާ ދެކޮޅަށް ބްރެޒިލްގެ ވިންގަރ އެންޓޮނީ އާއި މިޑްފީލްޑަރު މެކް ޓޮމިނީ އަދި ފޯވާޑް އެންތޮނީ މާޝިއަލްއަށް ނުކުޅެވޭނެއެވެ. މީގެ އިތުން މިމެޗަށް ސަސްޕެންޑް ވެފައިވާތީ ޑިފެންޑަރު ލިސަންދްރޯ މާޓިނޭޒް އާއި މާސެލް ސަބިޓްޒާއަށްވެސް ބާސާއާ ދެކޮޅަށް ނުކުޅެވޭނެއެވެ.
މިމެޗް ފަށާނީ ރާއްޖޭ ގަޑިން މިރޭ 22:45 ގައެވެ.
