މީގެ 12 ދުވަސް ކުރިން ތުރުކީއަށް ކުރިމަތިވި ބާރުގަދަ ބިންހެލުމަށްފަހު ގެއްލުނު ޗެލްސީ އާއި ނިއުކާސަލް ޔުނައިޓެޑުގެ ކުރީގެ ފުޓްބޯޅަ ކުޅުންތެރިޔާ ކްރިސްޓިއަން އަޓްސޫ މަރުވެފައި އޮއްވައި ފެނިއްޖެ ކަމަށް އޭނާގެ އެޖެންޓް ބުނެފިއެވެ.
ފެބްރުއަރީ 6 ވަނަ ދުވަހު ބިންހެލުން ކުރިމަތިވިއިރު އަޓްސޫ ދިރިއުޅެމުން ދިޔައި ތުރުކީގެ ދެކުނުގެ ހަޓޭ ޕްރޮވިންސްގައެވެ. އަޓްސޫ ކުޅެމުންދިޔައީ ހަޓޭސްޕޯރަށެވެ. އޭނާ މަރުވެފައި އޮއްވައި ފެނުނީ އިމާރާތްތަކުގެ ދަށުން އިއްޔެގެ ވަގުތެއްގައި ކަމަށް އޭނާގެ އެޖެންޓް އުޒުންމެހެމެޓް ގޯލް.ކޮމްއަށް ވަނީ މައުލޫމާތު ދީފައެވެ.
ގާނާއަށް އުފަން އަޓްސޫ، ބިންހެލުން އައުމުގެ ދެދުވަސް ކުރިން އާއިލާ ކައިރިއަށް ގާނާއަށް ދިޔުމަށް ދަތުރުގެ ކަންކަން ހަމަޖެއްސި ކަމަށްވެއެވެ. އަދި ބިންހެލުން ކުރިމަތިވުމުގެ އެއްދުވަސް ކުރިން ކަސިމްޕާސާގެ މައްޗަށް ހަޓޭސްޕޯރު ފަހު ސިކުންތުގައި ކުރި ހޯދީ އަޓްސޫގެ ލަނޑުންނެވެ. އެމެޗަށްފަހު ގާނާއަށް ދިޔުމަށް އަޓްސޫ ހަމަޖެއްސި ދަތުރު ކެންސަލް ކުރީއެވެ.
ތުރުކީއާ އާއި ސީރިއާއަށް ކުރިމަތިވި ބާރުގަދަ ބިންހެލުމުގައި މިހާތަނަށް 45،000 މީހުން މަރުވެފައިވާކަން މިހާތަނަށް ވަނީ ޔަގީން ކުރެވިފައެވެ.
