ފްރާންސްގެ ފުޓްބޯޅަ ޝަހްސިއްޔަތު ޖަސްޓް ފޮންޓެއިން އުމުރުން 89 އަހަރުގައި މިއަދު މަރުވެއްޖެއެވެ.
ފޮންޓެއިން ފުޓްބޯޅައިގެ ދަނޑުގައި ވިދާލައިގެން ދިޔައީ 1953 ވަނަ އަހަރުގެ ވަރލްޑް ކަޕުގައި އެންމެ 6 މެޗުން 13 ލަނޑު ކާމިޔާބު ކުރުމުންނެވެ. މިއަދާ ހަމައަށްވެސް މިރެކޯޑް އެހެން ކުޅުންތެރިޔަކަށް މުގުރާލެވިފައެއް ނުވެއެވެ.
ފޮންޓެއިންއަކީ މިދިޔަ ގަރުނުގައި ފްރާންސުން ހޮވި އެގައުމުގެ ގަރުނުގެ އެންމެ މޮޅު ކުޅުންތެރިޔާއެވެ. ފޮންޓެއިން މަރުވުމާއި ގުޅިގެން ފްރާންސްގެ ފުޓްބޯޅަ ފެޑެރޭޝަނުން ނެރުނު ނޫސްބަޔާނުގައި ބުނެފައި ވަނީ ފޮންޓެއިންއަކީ ފުޓްބޯޅައިގެ ތާރިހުގައި ފެނުނު އެންމެ ރީތި އެއްސަފްހާ ލިޔުނު ކުޅުންތެރިޔާ ކަމަށެވެ. "ގެއްލިގެންދިޔައީ ފްރާންސް ފުޓްބޯޅައިގެ މޫނުމަތި. ފުޓްބޯޅައިގެ އެންމެ ވަރުގަދަ ޝަހްސިއްތު. ލަނޑު ޖެހުމުގައި އަބަދަށްފެހި ފޯވާޑް" ފްރާންސް ފުޓްބޯ ފެޑެރޭޝަނުން ނެރުނު ނޫސްބަޔާނުގައި ބުނެފައިވެއެވެ.
ފޮންޓެއިން ކްލަބު ކެރިޔަރުގައި ގިނަ ދުވަސްތައް ހޭދަކުރީ ފްރާންސްގެ ރެއިމްސްގައެވެ. އެކްލަބަށް 152 މެޗުން 145 ލަނޑު ކާމިޔާބު ކޮށްދިނެވެ. ރެއިމްސްއަށް ފްރާންސް ލީގް ކާމިޔާބު ކޮށްދިނުމުގެ އިތުރުން 1959 ވަނަ އަހަރުގެ ޔޫރަޕިއަން ކަޕުގެ ފައިނަލުން ރެއިމްސް ޖާގަ ހޯދީ ފޮންޓެއިންގެ ލަނޑުތަކުންނެވެ. އެކަމަކު ރެއާލް މެޑްރިޑުގެ އަތުން ފައިނަލުގައި ރެއިމްސް ބަލިވީއެވެ.
ކޯޗިން ކެރިޔަރަށް ބަލާއިރު ފްރާންސް ގައުމީ ޓީމަށް 2 މެޗެއްގައި ފޮންޓެއިން އިރުޝާދު ދިނެވެ. މީގެ އިތުރުން 1974 ވަނަ އަހަރު، ޕީއެސްޖީ ދެވަނަ ޑިވިޜަނުގައި ވަނިކޮށް ފުރަތަމަ ޑިވިޜަނަށް (މިހާރުގެ ފްރެންޗް ލީގް 1) އަށް އެޓީމް ކޮލިފައި ކޮށްދިނީވެސް ފޮންޓެއިންއެވެ. އޭގެ ފަހުން ޕީއެސްޖީ ފުރަތަމަ ޑިވިޜަނުން ރެލިގޭޓް ވެފައެއް ނުވެއެވެ.
