ފަރެސްމާތޮޑާގައި މިހާރު ކުރިއަށްދާ "އެސްޓީއޯ އެފްއެމްސީ ފުޓްސަލް ޗެލެންޖް 2023" ގެ ފައިނަލުން މާތޮޑިއަންސް އާއި ބެންޑިޓް މިރޭ ޖާގަ ހޯދައިފިއެވެ.
ލީގް އުސޫލުން އެންމެ ގިނަ ޕޮއިންޓް ހޯދާ ދެޓީމަށް ފައިނަލުން ފުރުސަތު ލިބޭ ގޮތަށް ކުރިއަށް ގެންދާ މިމުބާރާތުގެ ފައިނަލުން މާތޮޑިއަންސް ޖާގަ ހޯދީ ލީގް ބުރުގެ އެއްވަނަ ޓީމުގެ ގޮތުގައެވެ. ޖުމްލަ 5 ޓީމު ވާދަކުރި މިމުބާރާތުގެ ލީގް ބުރުގެ އެއްވަނަ މާތޮޑިއަންސް ހޯދީ މިރޭ ފެނަކައާ ދެކޮޅަށް ކުޅުނު މެޗް 8-3 އިން ކާމިޔާބު ކޮށްގެންނެވެ. މިމެޗުގެ މޮޅު ކުޅުންތެރިޔާގެ މަގާމަށް ހޮވުނީ މުބާރާތުގައި މޮޅު ކުޅުމެއް ދައްކަމުން އަންނަ މާތޮޑިއަންސްގެ މުހައްމަދު ނާއިލްއެވެ.
މާތޮޑިއަންސަށް ލީގް ބުރުގެ އެއްވަނަ ލިބެނީ ކުޅުނު 4 މެޗުގެ ތެރެއިން 3 މެޗުން މޮޅުވެ 1 މެޗް އެއްވަރުކޮށް ޖުމްލަ 10 ޕޮޮއިންޓް ހޯދައިގެންނެވެ. ހަތަރު މެޗުގައި އެޓީމުން 25 ލަނޑު ކާމިޔާބު ކޮށްފައިވާއިރު ބައިކޮޅަށް ވަދެފައި ވަނީ 8 ލަނޑެވެ.
ލީގް ބުރުގެ ދެވަނަ ޓީމުގެ ގޮތުގައި ބެންޑިޓް ފައިނަލުން ޖާގަ ހޯދީ އެފްސީ ޗެލެންޖާސްއާ ދެކޮޅަށް ކުޅުނު ފޯރިގަދަ މެޗް 8-6 އިން ކާމިޔާބު ކޮށްގެންނެވެ. މެޗް އެއްވަރު ކޮށްލައިގެންވެސް ޗެލެންޖާސްއަށް ފައިނަލަށް ދެވެން އޮތެވެ. އެކަމަކު ބެންޑިޓުން ވަނީ މެޗް ފެށިގެން ނިމެންދެން ފައިނަލުން ޖާގަ ހައްގު ކުޅުމެއް ދައްކައި އެޓީމު ކޮޅަށް ނަތީޖާ އަނބުރާލާފައެވެ. މިމެޗުގައި އެޓީމުގެ ތަރިޔަކަށްވީ ޔާސިރު މުހައްމަދެވެ.
ލީގް ބުރުގެ ދެވަނަ ބެންޑިޓަށް ލިބުނީ 9 ޕޮއިންޓާއެކުއެވެ. 7 ޕޮއިންޓާއެކު ޗެލެންޖާސް ދިޔައީ ތިންވަނައަށެވެ. ތިން ޕޮއިންޓާއެކު ހަތަރުވަނައަށް ދިޔައީ ފެނަކައެވެ. ޕޮއިންޓެއް ނުލިބި ގެއްލުން 23 ލަނޑާއެކު ލީގް ބުރުގެ ފުލަށް ދިޔައީ ކްލަބް އެއަރޕޯޓެވެ.
މާތޮޑިއަންސް އާއި ބެންޑިޓް ބައްދަލު ކުރާ ފައިނަލް މެޗް ކުޅުމަށް ހަމަޖެހިފައި ވަނީ ކުރިއަށް އޮތް ހޮނިހިރު ދުވަހުގެ ރޭ ގައެވެ.
