ރައްޔިތުންގެ މަޖިލީހުގެ މަތިވެރި ދާއިރާގެ މެމްބަރު ހަސަން ޒަރީރަށް ނުރައްކާތެރި ހަތިޔާރެއްގެ ގޮތުގައި ބެލެވިދާނެ އެއްޗެއް ބޭނުންކޮށްގެން ހަމަލާދީ ޒަހަމްކޮށްލައިފިއެވެ.
ފުލުހުން ވިދާޅުވީ މެމްބަރު ޒަރީރަށް ހަމަލާދިނީ ހެންވޭރުގައި ހުންނަ ހަބީބީ ކެފޭ އެންޑް ބީސްޓްރޯ ތެރޭގައި ހުއްޓާ ކަމަށެވެ.
މީގެ އިތުރުން ފުލުހުން ވިދާޅުވީ މިއަދު ހެނދުނު 5:08 ހާއިރު ރިޕޯޓްކުރި އެ މާރާމާރީއާ ގުޅިގެން މެމްބަރު ޒަރީރަށް ލިބުނު އަނިޔާއަށް އޭޑީކޭ ހޮސްޕިޓަލުގައި ދަނީ ފަރުވާ ދެމުންދާ ކަމަށެވެ. ނަމަވެސް، ލިބުނު އަނިޔާގެ ތަފްސީލެއް އަދި ނުލިބެއެވެ.
އަދި މި މައްސަލައާ ގުޅިގެން އެއްވެސް މީހަކު ހައްޔަރެއް ނުކުރެއެވެ.
ފުލުހުން މި މައްސަލަ ދަނީ ތަހުގީގުކުރަމުންނެވެ.
(ނޯޓް: ކުރިން މި ހަބަރު ލިޔުނު އިރު "ތޫނު އެއްޗަކުން ހަމަލަދީފައިވާ ކަމަށް" ލިޔެވިފައި ވަނީ ފުލުހުންނަށް އެވަގުތު ލިބިފައިވާ މައުލޫމާތުގެ ކުށަކުން ކަމަށް ފުލުހުން ފަހުން ވަނީ މެސެޖަކުން އަންގަވާފައެވެ. އެހެންކަމުން ކުށް އެވަނީ ރަނގަޅުކޮށްފައެވެ.)
