ށ.ކަނޑިތީމަށް އުފަން އާދަމް މުހައްމަދާއި މިޒްނާ މޫސާ ގެ 3 ވަނަ ދަރިފުޅު އަހުމަދު ޖޫދު އާދަމަށް އަދި މިވީ 10 މަހެވެ.
އެ ކުއްޖާއަކީ އުފަންވުމުގެ ކުރިން ފެށިގެން ކިޑްނީ ދުޅަވުމުގެ މައްސަލަ ދިމާވެފައިވާ ކުއްޖެކެވެ. މިކަމަށް ފަރުވާ ކުރުމަށް އެ ދެމަފިރިން އިންތިހާއަށް ބޭނުން ވެއެވެ. އެކަމަށް ފަރުވާ ކުރުމަށް ބޭނުންވާ ފައިސާ ހޯދުމަށް އެކި ޕްލެޓް ފޯމްތައް ބޭނުން ކޮށްގެން އެ ދެމަފިރިން ގެންދަނީ މަސައްކަތް ކުރަމުންނެވެ. އެގޮތުން ސޯޝަލް މީޑިއާގައި ޖަހާފައިވާ ޕޯސްޓެއް ފެނިގެން ގުޅާލީމެވެ.
ހަލިނިވްސް އަށް މައުލޫމާތު ދެމުން ޖޫދުގެ ބައްޕަ އާދަމް ބުނީ، ބަނޑުބޮޑުވި ދުވަހުން ފެށިގެން އަންހެނުން އުޅެމުންދިޔައީ ވަރަށް ބަލިކޮށް ކަމަށެވެ. މިގޮތުން ހަކުރު މާމައްޗަށް ދިއުމުން ދިމާވާ އެކި އުދަގޫތަކުގެ ސަބަބުންނާއި، އަންހެނުންނަކީ އޭގެ ކުރިން 2 ފަހަރު ސިޒޭރިއަން ހަދާފައިވާ މީހަކަށްވުމުން ވީހާވެސް ރަނގަޅަށް ފަރުވާކުރެވޭނެ މަގުފަހިކުރުމަށް އާއިލާއިން މަސައްކަތް ކުރިކަމަށެވެ.
އަންހެނުން ރަށުގައި ބަހައްޓާފައި އާދަމް ވަޒީފާ އަދާކުރަމުންދިޔައީ މާލޭގައި ހުންނަ ލިޓަސް މޯލްޑިވްސް ދޯންޏެއްގެ ކެޕްޓަނެއްގެ ގޮތުގައެވެ.
އޭނާގެ އަންހެނުން މިޒްނާގެ ބަނޑަށް އަށްމަހުގަ ހަކުރު މާބޮޑަށް މައްޗަށް ގޮސްގެން މާލެ ގެނެސް އައިޖީއެމްއެޗް އެމަޖެންސީގައި އެޑްމިޓްކޮށްގެން ފަރުވާދޭންފެށި އިރުވެސް ބަނޑުގައިވާ ދަރިފުޅުގެ ކިޑްނީގެ މައްސަލައެއް ހުރިކަމެއް އާއިލާއަށް ނޭގެއެވެ.
އާދަމް ބުނީ އެހާހިސާބުން ވަރަށް ކަންބޮޑުވިކަމަކަށެވެ. އަދި އާދަމް ގެ ކޮއްކޮއަކީ މިކަހަލަ މައްސަލައެއް ޅައުމުރުގައި ދިމާވެ ކިޑްނީ ފެއިލްވެފައިވާ ކުއްޖެއް ކަމަށްވުމުން އާއިލާގެ ކަންބޮޑުވުން އިންތިހާއަށް ދިޔަކަމަށެވެ.
އާދަމްގެ ދަރިފުޅު ޖޫދު ވިހެއުމަށްފަހު އެންމެފުރަތަމަ ސްކޭންކުރީ ވިހޭތާ 6 ވަނަ އަށްވީ ދުވަހުއެވެ. އެއިރު ކިޑްނީގެ ދުޅަކަންހުރީ 1.5 ސެންޓިމީޓަރ އަށް ކަމަށް އާދަމްވަނީ މައުލޫމާތު ދީފައެވެ. އަދި ދަރިފުޅު ބޮޑުވާވަރަކަށް އިތުރަށް ސްކޭން ހަދާ ވާގޮތް ބެލުމަށް ޑޮކްޓަރު އެއިރު ވަނީ ލަފާދީފައެވެ.
ރާއްޖެއިން ފަރުވާދެވެން ނެތިގެން އިންޑިއާގެ ބެންގަލޫރުގެ އެން.ޔޫ ހޮސްޕިޓަލަށް ދެއްކުމަށް އައިޖީ.އެމް.އެޗް އިން ދީފައިވާ ލިޔުމުގައި ބުނެފައިވާތީ ޖޫދުގެ ބޭސް ފަރުވާއަށް އާސަންދަވަނީ ހަމަޖެހިފައެވެ. އަދި ޖޫދުގެ އިތުރުން އިތުރު މީހަކަށް ޓިކެޓް ހަމަޖެހުނު ކަމުގައިވިއަސް އެހާ ކުޑަކުޑަ ކުއްޖަކު ގޮވައިގެން މަންމައާއި ބައްޕަ ދާން ބޭނުންވެއެވެ. ކޮވިޑްގެ ހާލަތު އޮތްގޮތުންނާއި އޮޕަރޭޝަން ކުރުމަށްފަހު އިންޑިއާގައި ހޭދަވާނެ ދުވަހެއް ނޭގޭތީ އާއިލާއިން އެދެނީ އާންމުންގެ ދީލަތި އެހީއެކެވެ.
