ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު (ހުކުރު ދުވަހު) މިއަދު ލަންޑަންގެ މަރލްބޮރޯ ހައުސްގައި ބޭއްވި ކޮމަންވެލްތު އިސްވެރިންގެ ބައްދަލުވުމުގައި ބައިވެރިވެވަޑައިގެންފި އެވެ.
ކޮމަންވެލްތުގެ ލީޑަރުންގެ މިބައްދަލުވުމަކީ ކޮމަންވެލްތުގެ ޒުވާނުންގެ އަހަރާއި ކޮމަންވެލްތުގެ ސުލްހައިގެ އަހަރާއި ޚާއްސަކޮށް ކޮމަންވެލްތުގެ އާ ވެރިޔާގެ ތާޖު އެޅުއްވުމާ ދިމާކޮށް ކޮމަންވެލްތު ޗާޓަރުގައި ސޮއިކުރިތާ 10 އަހަރު ފުރުމުގެ ހަނދާނުގައި ބާއްވާ ހަރަކާތެކެވެ.
ކޮމަންވެލްތުގެ ލީޑަރުންގެ މިހަރަކާތް ވެގެންދިޔައީ، ތަޚުތަށް އިށީނދެވަޑައިގަތުމުގެ ކުރިން "ރަސްގެފާނު ޗާލްސް-3 އާ ބައްދަލުވެ، ކޮމަންވެލްތުގެ އާ ވެރިޔާގެ މަގާމަށް މަރުހަބާ ކިޔުމަށް ކޮމަންވެލްތުގެ އިސްވެރިންނަށް ލިބުނު ހާއްސަ ފުރުސަތަޖަށެވެ. މި ބައްދަލުވުމުގައި ކޮމަންވެލްތުގެ ލީޑަރުންވަނީ އެބޭފުޅުންގެ ހިއްސާވުންތައް ފާހަގަކޮށް، ކޮމަންވެލްތުގެ މުސްތަގުބަލާ ބެހޭ ގޮތުން ވާހަކަ ދައްކަވާފައެވެ. މި މަޝްވަރާގައި މައިގަނޑު ގޮތެއްގައި އަލިއަޅުވާލާފައިވަނީ ސުލްހައާއި ދެމެހެއްޓެނިވި ތަރައްގީ ފަދަ މައްސަލަތަކުގައި ކޮމަންވެލްތު ޗާޓަރު ކުރިއަށް ގެންދިއުމުގައި ކޮމަންވެލްތު ޒުވާނުންގެ ގާބިލްކަމުގެ މައްޗަށެވެ.
މި ހަރަކާތަށް ފަހު ކޮމަންވެލްތުގެ ސަރުކާރުތަކުގެ އިސްވެރިންނާއި އެބޭފުޅުންގެ މަންދޫބުން އެކުގައި ރަސްގެފާނު ޗާލްސް ތިންވަނަ އާއި އެކު ރަސްމީ ފޮޓޯއެއް ނެގުމަށް ވަނީ ހުއްޓިވަޑައިގެންފައެވެ.
ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހާއި ފަސްޓް ލޭޑީ ފަޒްނާ އަހުމަދު މިހާރު އިނގިރޭސިވިލާތަށް ކުރައްވަމުން ގެންދަވާ މި ރަސްމީ ދަތުރުފުޅަކީ، ރަސްގެފާނު ޗާލްސް ތިންވަނަ އާއި ރަސްގެފާނު ރާނީ ކެމީލާ ތަޚުތުގައި (ވެޑުވުމުގެ) އިށީނދެވަޑައިގަތުމުގެ ރަސްމިއްޔާތުގައި ބައިވެރިވެވަޑައިގަތުމަށް ކުރައްވާ ދަތުރުފުޅެކެވެ. މި ރަސްމިއްޔާތު އޮންނާނީ 2023 ވަނަ އަހަރުގެ މެއި މަހުގެ ހަ ވަނަ ދުވަހު "ވެސްޓްމިންސްޓާ އެބީ"ގައެވެ.
