2022 ވަނަ އަހަރުގެ ހިއްސާ އަކަށް 77 ރުފިޔާ ކަނޑައަޅައިފިއެވެ. މިއީ ވޭތުވެދިޔަ ސޯޅަވަރަކަށް އަހަރަށް ބަލާލިކަމުގައި ވިޔަސް ދެވޭ އެންމެ ބޮޑު ޑިވިޑަންޑެވެ.

ހުޅުމާލެ ސެންޓްރަލް ޕާކުގެ ބިޔަ ޓެންޓުގައި މިރޭ ބޭއްވި އެސްޓީއޯގެ އަހަރީ އާއްމު ޖަލްސާގައި ހިއްސާދާރުންނަށް ފާސް ކުރަން ބޯޑުން ނިންމާފައިވާ ހިއްސާއަކަށް 77ރ. ބަހަން ފާސްކުރީ ހިއްސާދާރުންގެ އަޣުލަބިއްޔަތުންނެވެ. އެސްޓީއޯގެ ހިއްސާދާރުންނަށް މިރޭ ބަހަން ފާސްކުރި އަދަދަކީ 2021 ގައި ހިއްސާއަކަށް ލިބުނު އަދަދަށްވުރެ 12ރ. ބޮޑު އަދަދެކެވެ.

މިރޭ ކުރިއަށްދިޔަ އެސްޓީއޯގެ އަހަރީ އާންމު ޖަލްސާގައި އެކުންފުނީގެ 2022 ވަނަ އަހަރުގެ ޕާރފޯމަންސް ރިޕޯޓް ހުށަހަޅުއްވައި ދެއްވަމުން، އެ ކުންފުނީގެ ޗީފް އެގްޒެކިއުޓިވް އޮފިސަރ އަދި މެނޭޖިން ޑިރެކްޓަރ އަބްދުﷲ ސައީދު ވިދާޅުވީ މިދިޔަ އަހަރަކީ އެސްޓީއޯގެ ތާރީހުގައިވެސް އެންމެ ބޮޑު ފައިދާއެއް ނެރެވުނު އަހަރުކަމަށާއި މިދިޔަ އަހަރަކީ އެސްޓީއޯގެ ހަޔާތުގައި އެންމެ ކާމިޔާބު އަހަރުކަމަށެވެ.

މިފައިދާ ނެރެވިގެންދިޔަ އެންމެ ބޮޑު ސަބަބަކީ ކުންފުނީގެ ސްޓްރެޓެޖިކް ޑިޒިޝަން ބައްޓަން ވެފައި އޮތް ގޮތުން ކަމަށްވެސް އަބްދުﷲ ސައީދު ވިދާޅުވިއެވެ.

އެސްޓީއޯ ގްރޫޕުން ވަނީ 18.8 ބިލިއަން ރުފިޔާއާއެކު ރެކޯޑް އާމްދަނީއެއް ހާސިލުކޮށްފައި ކަމަށް މިރޭގެ ޕާފޯމަންސް ރިޕޯޓުގެ ފައިނޭންޝަލް ރިޒަލްޓްސް ހުށަހަޅައިދެމުން އެސްޓީއޯގެ އެމްޑީ އަބްދުﷲ ސައީދު ވަނީ ވިދާޅުވެފައެވެ. މިއީ އޭގެ ކުރީ އަހަރާ އަޅާބަލާއިރު 67 އިންސައްތަ ކުރިއެރުމެއް ކަމަށްވެސް ވިދާޅުވިއެވެ.

އެސްޓީއޯގެ އާމްދަނީ އިތުރުވުމުގެ މައިގަނޑު ސަބަބަކީ ދުނިޔޭގެ ތެލުގެ ބާޒާރުގައި ތެލުގެ އަގު އުފުލުމާއެކު ވިއްކާ އަގަށް އެބަދަލު އައުމުންނާއި ފާއިތުވި އަހަރު އެސްޓީއޯ ގްރޫޕުން ވިއްކި ތެލުގެ އަދަދު އިތުރު ވުމުންނާއި ގްރޫޕްގެކުންފުނިތަކުގެ އާމްދަނީ ޖުމްލަ ގޮތެއްގައި އިތުރުވުމުންކަމަށް ސައީދު ވިދާޅުވިއެވެ.

އެސްޓީއޯއަށް އެކަނި ބަލާލާ ކަމުގައިވާނަމަ ލިބިފައި ވަނީ 18.8 ބިލިއަން ރުފިޔާއެވެ. މިއީ 79 އިންސައްތައިގެ ކުރިއެރުމެއް ކަން އެކުންފުނީގެ އެމްޑީ ފާހަގަކުރެއްވިއެވެ. 2022 ވަނައަހަރު އެސްޓީއޯ ގްރޫޕަށް އޮޕަރޭޓިން ޕްރޮފިޓްގެ ގޮތުގައި 1.4 ބިލިއަން ރުފިޔާ ލިބިފައިވާއިރު ކުންފުންޏަށްވެސް ރެކޯޑު އަދަދަކަށް ވަނީ 1 ބިލިއަން ރުފިޔާ ލިބިފައިކަމަށާއި މިއީ އެސްޓީއޯ އަދި އެސްޓީއޯ ގްރޫޕްގެ ތާރީހުގައި ވެސް އޮޕަރޭޓިން ޕްރޮފިޓްގެ ގޮތުގައި 1 ބިލިއަނަށް އެރި ފުރަތަމަ ފަހަރުކަންވެސް ސައީދު ވަނީ ފާހަގަ ކުރައްވާފައެވެ. އެސްޓީއޯ ކުންފުނީގެ ފައިދާ އިތުރު ވުމާއި އަދި މިފްކޯގެ ފައިނޭންޝިއަލް އެޖަސްޓަމަންޓްތަކާއެއްކޮށް ނެޓް ޕްރޮފިޓް ނުވަތަ ސާފު ފައިދާގެ ގޮތުގައި އެސްޓީއޯއަށް ވަނީ 1 ބިލިއަން ރުފިޔާ ލިބިފައި ކަމަށް ސައީދު ވިދާޅުވިއެވެ. ކުންފުނިން ކުރަމުން އަންނަ ވިޔަފާރިތައް ހަރުދަނާ ކުރެވި ޖުމްލަ ފައިދާ އިތުރުކުރެވުމާއެކު ސާފުފައިދާގެ ގޮތުގައި އެސްޓީއޯއަށް ވަނީ 0.73 ބިލިއަން ރުފިޔާ ލިބިފައެވެ. މީ އޭގެ ކުރީ އަހަރާ އަޅާ ބަލާއިރު 50 އިންސައްތަ ކުރިއެރުމެކެވެ.

2022 ވަނަ އަހަރުގެ ހިއްސާއަކަށް 77 ރުފިޔާ ހުށަހެޅުމުން ޑިރެކްޓަރުންގެ ބޯޑުން ވަނީ އެގޮތް ނިންމާފައި ކަމަށާއި މިއީ ވޭތުވެދިޔަ ސޯޅަވަރަކަށް އަހަރަށް ބަލާލިކަމުގައި ވިޔަސް ދެވޭ އެންމެ ބޮޑު ޑިވިޑަންޑް ކަން އެސްޓީއޯގެ އެމްޑީ އަދި ސީއީއޯ ވަނީ މި ރިޕޯޓު ހުށަހަޅައިދިނުމުގެ ތެރޭގައި ފާހަގަ ކުރައްވާފައެވެ.

އެސްޓީއޯ ގްރޫޕް ވިޔަފާރީގެ އާމްދަނީ

  • މޯލްޑިވްސް ގޭސް: 223 މިލިއަން

  • އެލައިޑް އިންޝުއަރެންސް: 188 މިލިއަން

  • މިފްކޯ: 1.5 ބިލިއަން

  • ނޭޝަނަލް ޝިޕިން: 308 މިލިއަން

  • އެފްއެސްއެމް: 13 ބިލިއަން

އެސްޓީއޯއިން މިރޭ ބޭއްވި އަހަރީ އާއްމު ޖަލްސާގައި އާއްމު ހިއްސާދާރުން ތަމްސީލް ކުރާ ޑިރެކްޓަރަށް ހޮވާފައިވަނީ މުހައްމަދު އަހްސަން ސަލީމް އެވެ. އަދި ކުރިއަށް އޮތް ހަތަރު އަހަރު ދުވަހަށް އޮޑިޓް ކުރަން ހޮވާފައިވަނީ ޕްރައިސް ވޯޓާ ހައުސް ކޫޕާސް އެވެ.

އިތުރު ލިޔުންތައް އެސްޓީއޯ