އިނގިރޭސި އެފްއޭ ކަޕުގެ ފައިނަލުގައި ކެޕްޓަން އީކާ ކުންޑޮގަން ކާމިޔާބު ކުރި ދެލަނޑުން ވާދަވެރި މެންޗެސްޓަރ ޔުނައިޓެޑް 2-1 އިން ބަލިކޮށް 7 ވަނަ ފަހަރަށް މެންޗެސްޓަރ ސިޓީއިން ރޭ ޗެމްޕިއަންކަން ހޯދައިފިއެވެ.
ވެމްބްލީ ސްޓޭޑިއަމްގައި ސިޓީއިން ލީޑް ނެގީ މެޗުގެ 12 ވަނަ ސިކުންތުގައި ގުންޑޮގަން އޭރިޔާ ބޭރުން ކާމިޔާބު ކުރި ހިތްގައިމު ލަނޑުންނެވެ. މިއީ އެފްއޭ ކަޕް ފައިނަލުގެ ތާރިހުގައި މިހާތަނަށް އެންމެ އަވަހަށް ކާމިޔާބު ކުރި ލަނޑެވެ.
މެންޗެސްޓަރ ޔުނައިޓެޑުން މެޗުގެ ތެރެއަށް ވަދެ 33 ވަނަ މިނެޓުގައި ކެޕްޓަން ބްރޫނޯ ފެނާންޑޭޒްގެ ލަނޑުން ނަތީޖާ ހަމަހަމަ ކުރިއެވެ. މިއީ ސިޓީގެ އޭރިޔާގެ ތެރެއިން ޖެކް ގްރީލިޝް އަތުގައި ޖެހުނު ކަމަށް ބަލައި ރެފްރީ ދިން ޕެނަލްޓީއަކުން ކާމިޔާބު ކުރި ލަނޑެކެވެ.
މިލަނޑަށްފަހު ކައުންޓަރ އެޓޭކްތަކުގައި ލީޑް ނަގާނެ ރަނގަޅު ދެތިން ފުރުސަތު މެންޗެސްޓަރ ޔުނައިޓެޑަށް ލިބުނެވެ.
ދެވަނަ ހާފް ފަށައިގެން ސިޓީއިން ދެވަނަ ފަހަރަށް ލީޑް ނެގީ 51 ވަނަ މިނެޓުގައެވެ. މިލަނޑަށްފަހު ސިޓީ ކުޅުނީ ވަރަށް ބޮޑަށް ފަހަތަށް އިސްކަންދީގެން، ކައުންޓާގައި ހަމަލާތައް އުފައްދާ ގޮތަށެވެ.
މެޗުގެ ފަހު ދިހަވަރަކަށް މިނެޓް ޔުނައިޓެޑުން ދިގު ބޯޅަތަކެއް ސިޓީގެ އޭރިޔާގެ ތެރެއަށް ހުރަސްކޮށްގެން ބޮލުން ގޯލެއް ޖެހުމަށް ވަރަށް ބޮޑަށް މަސައްކަތް ކުރިއެވެ. މީގެ ތެރެއިން އެއްހަމަލާ އަމާޒުވީ ސިޓީ ގޯލުގެ މަތީ ދަނޑިއަށެވެ.
މިއީ ކިތައްމެ ވާދަވެރިނަމަވެސް ސިޓީ އާއި ޔުނައިޓެޑް ވާދަވެރި މުބާރާތެއްގެ ފައިނަލުގައި ވާދަކުރި ފުރަތަމަ ފަހަރެވެ. އަނެއްކޮޅުން މިއީ އެފްއޭ ކަޕް ފައިނަލުން ޔުނައިޓެޑް ބަލިވި 9 ވަނަ ފަހަރެވެ. މިއީ މުބާރާތުގެ ބަލިވުމުގެ ރެކޯޑެކެވެ.
މިއީ ސިޓީއިން އެއްސީޒަނެއްގައި 3 ތަށި ކާމިޔާބު ކުރުމަށް ދެކެމުން އަންނަ ހުވަފެނަށް އިތުރުވި ބޮޅެކެވެ. އަންނަ ހޮނިހިރު ދުވަހުގެ ރޭ ޗެމްޕިއަންސް ލީގް ފައިނަލުގައި އިންޓަމިލާނުގެ މައްޗަށް ކުރި ހޯދިއްޖެނަމަ އެއްސީޒަނެއްގައި އެޓީމަށް 3 ކާމިޔާބު ކުރެވި، 1999 ވަނަ އަހަރު މެންޗެސްޓަރ ޔުނައިޓެޑުން 3 ތަށި ކާމިޔާބުކޮށް ހަދާފައިވާ ރެކޯޑާ (އިނގިރޭސިވިލާތަނަށް ނިސްބަތްވާ ކްލަބުތަކުގެ ތެރެއިން) އެއްވަރު ކުރެވުނީއެވެ.
