އަނިޔާގެ މައްސަލަތަކާހުރެ، ސްވިޑަން އާއި އޭސީމިލާނުގެ ތަޖުރިބާކާރު ފޯވާޑް ޒަލްޓާން އިބްރަހިމޮވިޗް ފުޓްބޯޅަ ކުޅުން ހުއްޓާލިކަން އިއުލާން ކޮށްފިއެވެ.
އުމުރުން 41 އަހަރުގެ އިބްރަހިމޮވިޗް ކުޅުން ހުއްޓާލިކަން އިއުލާންކޮށް މިލާނުގެ ސަޕޯޓަރުންނާ އެންމެފަހުގެ ސަލާން ގަލާން ކުރުން އޮތީ ރޭ މިލާނާއި ވެރޯނާ، މިލާނުގެ ދަނޑުގައި ބައްދަލު ކުރި މެޗަށްފަހުއެވެ. މިމެޗް 3-1 އިން ކާމިޔާބު ކުރީ މިލާނެވެ.
ސްވިޑަންގެ އެންމެ ކާމިޔާބު ކްލަބް މަލްމޯއިން ސީނިއަރ ކެރިޔަރު ފަށައި އަޔަކްސް، ޔުވެންޓަސް، އިންޓަމިލާން، ބާސެލޯނާ، ޕީއެސްޖީ، މެންޗެސްޓަރ ޔުނައިޓެޑް އަދި އެމެރިކާގެ އެލްއޭ ގެލެކްސީއަށް ކުޅުނު އިބްރަހިމޮވިޗުގެ އެންމެ ހާއްސަ ކާމިޔާބީއަކީ 2021/2022 ސީޒަނުގެ އިޓަލީގެ ޗެމްޕިއަންކަން މިލާނާއެކު ހޯދުމެވެ.
އިބްރަހިމޮވިޗުގެ 24 އަހަރުގެ ފުޓްބޯޅަ ކެރިޔަރުގައި އޭނާ ވަނީ ހޮލެންޑް، އިޓަލީ، ފްރާންސް އަދި ސްޕެއިނުގައި ލީގް ޗެމްޕިއަންކަން ހޯދާފައެވެ. އަދި މެންޗެސްޓަރ ޔުނައިޓެޑާއެކު ޔުރޮޕާ ލީގާއި އިނގިރޭސި ލީގް ކަޕާއި ކޮމިއުނިޓީ ޝީޑް މެޗް އެކްލަބާއެކު ކާމިޔާބު ކުރިއެވެ.
ކްލަބް ކެރިޔަރުގައި 637 މެޗުން 405 ލަނޑު އަދި ސްވިޑަން ގައުމީ ޓީމަށް 122 މެޗް ކުޅެދީ 62 ލަނޑު އިބްރަހިމޮވިޗް ވަނީ ކާމިޔާބު ކޮށްދީފައެވެ.
ކުޅުން ހުއްޓާލިކަން އިއުލާން ކުރުމަށްފަހު އިބްރަހިމޮވިޗް، މިލާނުގެ ސަޕޯޓަރުންނަށް ބުނީ އަބަދުވެސް މިލާނާއ މިލާނުގެ ސަޕޯޓަރުންދެކެ ލޯބިވާނެ ކަމަށާއި އޭނާއަށްދިން ލޯތްބާއި އިހްތިރާން ހަނދާން ނުނެތޭނެ ކަމަށެވެ.
