މެޗުގެ ފަހު ވަގުތު ޖެރޯޑް ބޯވެން ކާމިޔާބު ކުރި ލަނޑުން 2-1 އިން ފިއޮރެންޓީނާ ބަލިކޮށް ޔުއެފާ ކޮންފަރެންސް ލީގުގެ ޗެމްޕިއަންކަން އިނގިރޭސި ޕްރިމިއަރ ލީގުގެ ވެސްޓްހޭމްއިން ރޭ ހޯދައިފިއެވެ.
ޗެކްރިޕަބްލިކުގެ ޕްރާގާ ސްޓޭޑިއަމްގައި ކުޅުނު މިމެޗުގައި ފުރަތަމަ ލަނޑު ޖަހައި ލީޑް ނެގީވެސް ވެސްޓްހޭމްއިންނެވެ. ދެވަނަ ހާފުގެ 62 ވަނަ މިނެޓުގައި ލިބުނު ޕެނަލްޓީއަކުން މިލަނޑު ކާމިޔާބު ކޮށްދިނީ ވިންގަރ ސައީދު ބެންރަހްމާއެވެ. އެކަމަކު 5 މިނެޓްފަހުން ޖިއަކޮމޯ ވެންޗޫރާ ލަނޑެއް ޖަހައި ފިއޮރެންޓީނާއަށް ނަތީޖާ ހަމަހަމަ ކޮށްދިނެވެ.
ނަތީޖާ ހަމަހަމަވުމާއެކު ދެން ފެނިގެންދިޔައީ ދެޓީމުގެ ކުޅުންތެރިންނާއި ސަޕޯޓަރުން ވަރަށް ބޮޑަށް ލޭހޫނުވެގެން ދިޔަ މަންޒަރެވެ. ސަޕޯޓަރުން ދަނޑަށް ފެންފުޅިފަދަތަކެތި އުކިއިރު، ދެޓީމުގެ ކުޅުންތެރިން ވަނީ ގިނަ ފައުލްތަކެއް ކޮށްފައެވެ.
ވެސްޓްހޭމްއިން ތަށި ހޯދި ލަނޑު، ބޯވެން ޖެހީ ކައުންޓަ އެޓޭކެއްގައި އުފެއްދި ހަމަލާއެއްގައި ބްރެޒިލްގެ މިޑްފީލްޑަރު ލޫކަސް ޕަކުއެޓާ ތަނަވަސްކޮށްދިން ހިތްގައިމު ޕާހަކުންނެވެ.
ކޮންފަރެންސް ލީގް ތައްޓާއެކު އެންމެ ބޮޑު އުފާވެރިކަމެއް ލިބުނީ ކެޕްޓަން ޑެކްލަން ރީސްއަށެވެ. މިއީ ރީސް އެކްލަބަށް ކުޅުނު ފަހު މެޗުގައި ކަމަށް ބެލެވޭއިރު، ކްލަބުގެ ކުރީގެ މޮޅު ކުޅުންތެރިން ކަމަށްވާ ބޮބީ މޫރާއި ބިލީ ބޮންޑްސް ފަދައިން އޭނާއަށްވެސް މިވަނީ ކްލަބަށް ތައްޓެއް ހޯދައި ދެވިފައެވެ.
އަނެއްކޮޅުން މިއީ ކޯޗް ޑޭވިޑް މޮއިސްއަށް ޔޫރަޕުގެ ފުޓްބޯޅަ މުބާރާތެއްގެ ތަށި ކާމިޔާބު ކުރެވުނު ފުރަތަމަ ފަހަރެވެ. ކުރިން މެންޗެސްޓަރ ޔުނައިޓެޑާއި އެވަޓަން އަދި ރެއާލް ސޮސިއެޑާޑަށް އިރުޝާދު ދީފައިވާ މޮއިސް ވަނީ މެޗަށްފަހު ވަރަށް ބޮޑަށް އުފާފާޅު ކޮށްފައެވެ.
މި މޮޅާއެކު އަންނަ ސީޒަނުގެ ޔޫރޮޕާ ލީގުގެ ޖާގައެއް ވެސް ވެސްޓްހޭމަށް ވަނީ ލިބިފައެވެ. މިއީ އެ ކްލަބުގެ ތާރީހުގައި ފުރަތަމަ ފަހަރަށް ޖެހިޖެހިގެން ތިން ފަހަރު ޔޫރަޕުގެ މުބާރާތެއް ތަމްސީލް ކުރަން ފުރުސަތު ލިބުނު ފުރަތަމަ ފަހަރެވެ.
