އިއްޔެ އިދިކޮޅު ކޯލިޝަނުން ކުރިއަށް ގެންދިޔަ މުޒާހަރާގެ ތެރެއިން ހައްޔަރު ކުރީ ފުލުހުންނާ ދިމާލަށް އެއްޗެއް އެއްލި މީހެއްކަމަށާއި ހައްޔަރު ކުރިމީހާ ހުރީ ކުޑަކުއްޖެއް ގޮވައިގެން ނޫންކަމަށް ފުލުހުން ހާމަކޮށްފިއެވެ.
މުޒާހަރާ ކުރިއަށްދިޔަ ވަގުތު އެސަރަޙައްދުގެ ފޮޓޯއެއް ނަގައިގެން މީހަކު ހައްޔަރު ކުރި ކަމަށާއި އަދި އެއީ ކުޑަކުއްޖެއް ގޮވައިގެން ހުރި މީހެއްކަމަށް ބުނެ ފަތުރަނީ އެއްވެސް ހަގީގަތެއް ނެތް ވާހަކަތަކެއް ކަމަށެވެ. ފުލުހުން ވަނީ ހައްޔަރު ކުރި މީހާއަކީ ކުޑަކުއްޖަކު ގޮވައިގެން ހުރި މީހެއްކަމަށް ދެކެވޭ ވާހަކަ ދޮގުކޮށްފައެވެ.
ކުޑަކުއްޖެއްގެ ހާޒިރުގައި ބެލެނިވެރިޔާ އަނިޔާވެރި ގޮތަކަށް ހައްޔަރުކުރި ކަމަށް ބުނެ ފުލުހުންނަށް ފާޑުކިއުންތައް އަމާޒުވެފައިަނިކޮށް ފުލުހުން ބުނީ ހައްޔަރުކުރީ މުޒާހަރާ ކުރިތަނުގައި ތިބި ފުލުހުންގެ ސަފު ކުރިމައްޗަށް އައިސް ފުލުހުންނާ ދިމާއަށް އެއްޗެއް އެއްލި މައްސަލައިގައި ކަމަށެވެ.
"އަދި އެއިރު އޭނާ ކައިރީ ކުޑަ ކުއްޖަކު ފެންނަން ނެތްކަން ފާހަގަ ކޮށްލަން،" ފުލުހުން ބުނެފައިވެއެވެ.
ފުލުހުން ހައްޔަރުކުރި މީހާއަކީ ސައިކަލެއްގައި ކުޑަކުއްޖަކު ގޮވައިގެން ދިޔަ މީހެއްކަމަށާއި އޭނާ ހައްޔަރުކުރީ ފޮޓޯއެއް ނެގުމުންކަމަށް ބުނެ ޕީޕީއެމް/ޕީއެންސީ އިން ވަނީ ބަޔާނެއްވެސް ނެރެފައެވެ.
މީސްމީޑިއާގައި އާންމުވެފައިވާ ވީޑިއޯއެއްގައި ފުލުހުން މީހަކު ހައްޔަރުކޮށް ވެހިކަލަށް އެރުވި ވަގުތު އެތަނުގައި ކުޑަކުއްޖަކު ހުންނަތަން ފެނެއެވެ. އެހެންނަމަވެސް ފުލުހުން ވަނީ މިވާހަކަ ދޮގުކޮށްފައެވެ.
