ލިވަޕޫލް އާއި ސެނަގާލްގެ ލެޖެންޑް، ސާޑިއޯ މާނޭ 43.4 މިލިޔަން ޑޮލަރުގެ ޓްރާންސްފީއެއްގެ ދަށުން ސައުދީ ޕްރޯ ލީގުގެ އަލް ނަސްރަށް މިރޭ ސޮއި ކޮށްފިއެވެ.
އަލް ނަސްރަކީ މަޝްހޫރު ކްރިސްޓިއާނޯ ރޮނާލްޑޯ ކުޅެމުން އަންނަ ކްލަބެވެ. ލިވަޕޫލް ދޫކޮށް މިދިޔަ ސީޒަނުގައި ޖަރުމަނުގެ ބަޔާން މިޔުނިކާ ގުޅުނު މާނޭ، އަލް ނަސްރަށް ބަދަލުވުމުގެ ކުރިން ބަޔާން މިޔުނިކުގައި އޭނާގެ ކެރިޔަރު ކުރިއަށް ގެންދެވޭތޯ މަސައްކަތް ކުރިއެވެ. އެކަމަކު އެކްލަބުގެ ކޯޗް ތޯމަސް ޓުޗެލް އެކްލަބުގައި މާނޭ ބަހައްޓަން ބޭނުން ނުވީއެވެ.
އަލް ނަސްރުން މާނޭއަށް މުސާރައިގެ ގޮތުގައި ހަފްތާއަކު 650،000 ޕައުންޑް ދޭނެއެވެ. ބަޔާން މިޔުނިކުން މާނޭއަށް ދިނީ ހަފްތާއަކަށް 350،000 ޕައުންޑެވެ. އޭނާއަކީ މިދިޔަ ސީޒަނުގައި ޖަރުމަނު ބުންޑަސް ލީގާގައި ކުޅުނު އެންމެ މުސާރަ ބޮޑު ކުޅުންތެރިޔާއެވެ.
އަލް ނަސްރުން މާނޭ އެކްލަބަށް ގެނެސް ޓީމު ވަރުގަދަ ކޮށްފައިވާއިރު، އެޓީމުގެ އަމާޒަކީ މިސީޒަނުގައި ސައުދީ ޕްރޯ ލީގުގެ ޗެމްޕިއަންކަން ހޯދުމެވެ. ރޮނާލްޑޯ މިދިޔަ ސީޒަނުގައި އަލް ނަސްރަށް ކުޅުނު ނަމަވެސް، އެޓީމުން ސީޒަން ނިންމާލަން ޖެހުނީ ލީގުގެ ދެވަނައިގައި އޮވެގެންނެވެ.
