ރާއްޖޭގެ ބައެއް ފިހާރަތަކުން ގަނޑުކުރި ކާބޯތަކެތި ވިއްކަނީ ސިއްހަތަށް ނުރައްކާވާ ގޮތަށް ކަމަށް މޯލްޑިވްސް ފުޑް އެންޑް ޑްރަގް އޮތޯރިޓީއިން ބުނެފިއެވެ.
އެ އޮތޯރިޓީން އާންމުކޮށްފައިވާ އިއުލާނެއްގައި ބުނީ ބައެއް ފިނިކުރި އަދި ގަނޑުކުރި ކާބޯތަކެތި ވިއްކަމުންދަނީ އެންމެ އެކަށީގެންވާ ފިނި ހޫނުމިނުގައި ނޫންކަން ފާހަގަކުރެވިފައިވާ ކަމަށާއި ގަނޑުކުރި އަދި ފިނިކުރި ކާބޯތަކެތި ވިއްކާ ފިހާރަތައް އޮތޯރިޓީން އިންސްޕެކްޓްކޮށް ނެގި ސާމްޕަލްތައް ތަޙުލީލުކޮށް ބެލި ބެލުމުގައި މިފަދަ އުފެއްދުންތަކުގެ ފިނިހޫނުމިން ބަހައްޓަންޖެހޭ މިންގަނޑުގައި ބަހައްޓާފައިނުވާކަން ފާހަގަވެފައިވާ ކަމަށެވެ.
އަދި ބައެެއް ކާބޯތަކެއްޗަކީ ވަކި ފިނިހޫނުމިނެއްގައި ބަހައްޓަން ޖެހޭ ތަކެެތި ކަމަށާއި، އޭގެ ފިނިހޫނުމިން ހުންނަން ޖެހޭ މިންވަރަށް ނުފެތޭ ނަމަ އެތަކެތީގެ ރައްކާތެރިކަން އަދި ފެންވަރު ގެއްލޭނެ ކަން ފާހަގަކޮށް އެ އޮތޯރިޓީން ބުނީ މިއީ އާންމު ސިއްހަތަށް ނުރައްކާވާނެެ ކަމެއްކަމަށެވެ.
އެގޮތުން ގަނޑުކުރި ކާބޯތަކެތީގެ ފިނިހޫނުމިން -18°C އަށްވުރެ މަތިނުވާނެ ގޮތަކަށް އަދި ފިނިކުރި ކާބޯތަކެތި 0-5°C އާއި ދެމެދުގައި ބެހެއްޓުމަށް އޮތޯރިޓީއިން ވަނީ އަންގާފައެވެ.
