ޓޮޓެންހަމްއަށް ކުޅެމުން އަންނަ އިނގިރޭސި ގައުމީ ޓީމުގެ އިތުބާރު ފޯވާޑް ހެރީ ކޭން ޖަރުމަނުގެ ބަޔާން މިޔުނިކަށް ބަދަލުވުމުގެ ކަންކަން ނިންމުމަށް ޖަރުމަނަށް ހިނގައްޖެއެވެ.
ބަޔާން މިޔުނިކަށް ކޭން ދޫކޮށްލުމަށް ޓޮޓެންހަމްއިން އެއްބަސްވީ 100 މިލިޔަން ޔޫރޯގެ ޓްރާންސްފާ ފީ އަކަށެވެ. ފުޓްބޯޅައިގެ ޚަބަރުތައް ގެނެސްދިނުމަށް މަޝްހޫރު ނޫސްވެރިޔާ ފެބްރީޒިއޯ ރޮމާނޯ ބުނެފައި ވަނީ ބަޔާން މިޔުނިކަށް ކޭން ބަދަލުވަނީ 4 އަހަރުގެ އެއްބަސްވުމެއްގެ ދަށުން ކަމަށެވެ. އަދި އެކްލަބުގައި އޭނާ ބޭނުން ކުރާނީ 9 ނަންބަރު ޖާޒީ ކަމަށެވެ.
ކޭން،30، ގަތުމަށް ބަޔާނުން ގިނަ މަސައްކަތްތަކެއްކޮށް މަސައްކަތް ކާމިޔާބު މިކުރީ މިދިޔަ ސީޒަނުގައި ޕޮލެންޑުގެ ނުރައްކާތެރި ފޯވާޑް ރޮބާޓް ލެވަންޑޮސްކީ ބަޔާން ދޫކޮށް ބާސެލޯނާއަށް ބަދަލުވުމުން ޓީމަށް ދިމާވެފައިވާ ލަނޑު ނުޖެހުމުގެ މައްސަލަ ހައްލު ކުރުމަށެވެ.
އިނގިރޭސި ޕްރިމިއަރ ލީގުގެ ކުޅުން މާދަމާ ފެށުމަށް ހަމަޖެހިފައިވާއިރު ޓޮޓެންހަމްއިން ކޭން ނުފެންނާނެކަން އެކްލަބުގެ ބައެއް އޮފިޝަލުންވެސް މިހާރު ވަނީ އިނގިރޭސި ބައެއް މީޑިޔާތަކަށް މައުލޫމާތު ދީފައެވެ. އެކަމަކު ޓޮޓެންހަމްއިން ރަސްމީކޮށް ކޭންގެ ޓްރާންސްފާގެ ކަންކަމާ ގުޅޭ ގޮތުން ވަކިއެއްޗެއް މިހާތަނަށް ބުނެފައެއް ނުވެއެވެ.
ކޭންއަކީ ޓޮޓެންހަމްގެ ތާރިހުގައި އެކްލަބަށް އެންމެ ގިނަ ލަނޑު ޖަހައިދިނުމުގެ ޝަރަފް އޮތް ކުޅުންތެރިޔާއެވެ. އެއީ 435 މެޗުން 280 ލަނޑު ޖަހައިގެންނެވެ.
