މަޖިލިސް މެމްބަރުންނަށް ރިޝްވަތު ދޭކަމަށް ބުނެ، ރައްޔިތުންގެ މަޖިލިހުގެ ރައީސް މުހައްމަދު ނަޝީދު އަންގަވައިގެން މަޖިލިސް އިދާރާއިން ފުލުހަށް މައްސަލަ ހުށަހަޅައިފިއެވެ.
މައްސަލަ ޕޮލިހަށް ހުށަހަޅާފައިވަނީ މިއަދުގެ ހެނދުނުގެ ވަގުތެއްގައިކަމަށް މަޖިލިސް އިދާރާއިން ވަނީ ހާމަކޮށްފައެވެ. މަޖިލިސް އިދާރާއިން މައްސަލަ ޕޮލިހަށް ހުށަހަޅާފައިވަނީ ކުރިޔަށް އޮތް ރިޔާސީ އިންތިހާބާ ދިމާކޮށް ރައްޔިތުންގެ މަޖިލިހުގެ މެމްބަރުންނަށް ރިޝްވަތު ދެމުންދާކަމަށް ބުނެއެވެ.
މެންބަރުންނަށް ރިޝްވަތު ދޭ ކަމަށް ތުހުމަތުކޮށް ވާހަކަ ދައްކަވަމުން ނަޝީދު ވިދާޅުވެފައި ވަނީ ރައީސް އިބްރާހިމް މުހައްމަދު ސާލިހު ގެންދަވަނީ ބިރެއްނެތި ދައުލަތުގެ ފައިސާ ބޭނުން ކުރައްވައިގެން މަޖިލިސް މެންބަރުންނާއި އެހެންވެސް މީހުންނަށް ރިޝްވަތު ދެއްވަމުން ކަމަށާއި އެކަމުން ވާނެ މޮޅެއް ނޯންނަވާނެ ކަމަށެވެ.
ރައީސް ނަޝީދު އެކްސް.ކޮމްގައި ކުރައްވާފައިވާ ޓުވީޓެއްގައި، ކުރިން ނަޝީދަށް ވަރަށް ބޮޑަށް ތާއީދު ކުރައްވަމުން އައި، މެމްބަރު ޝިޔާން ޑިމޮކްރެޓްސް ދޫކޮށް އެލުން އެމްޑީޕީއަށް ސޮއިކުރެއްވުމަށް އިޝާރާތްކުރައްވައި ތުހުމަތުކުރައްވާފައިވަނީ އެގޮތަށް ރިޝްވަތު ދެއްވަމުން ގެންދިއުމުން ވިއްޔާ ވާނީ ފަޟީހަތް ކަމަށް ވިދާޅުވެ ވަނީ އިންޒާރު ދެއްވާފައެވެ. ނަމަވެސް ރިޝްވަތުގެ ގޮތުގައި އެ މެންބަރުންނަށް ހުށަހެޅީ ކޯއްޗެއް ކަމެއް ނަޝީދު ވިދާޅުވެފައެއް ނުވެއެވެ.
މެމްބަރު ޝިޔާންއަކީ އެމްޑީޕީ ދޫކުރައްވައި ދަ ޑިމޮކްރެޓްސް އަށް ސޮއިކުރެއްވި ބާރަ މެމްބަރުންގެ ތެރެއިން އެއް މެމްބަރެކެވެ. ޝިޔާނަކީ ރައްޔިތުންގެ މަޖިލިހުގެ ރައީސް މުހައްމަދު ނަޝީދުގެ އެންމެ އަރިސް މެމްބަރުންގެ ތެރޭގައެވެ. ދާދި ފަހަކާ ޖެހެންދެން ވެސް ޝިޔާން ހުންނެވީ ރައީސް ނަޝީދާއެކުގައެވެ.
