ވާދަވެރި މެންޗެސްޓަރ ޔުނައިޓެޑުގެ މައްޗަށް އަމިއްލަ ދަނޑުގައި 3-1 އިން ކުރި ހޯދައި އާސެނަލްއިން މިރޭ ފެންވަރު ދައްކާލައިފިއެވެ.
މެޗުގެ 27 ވަނަ މިނެޓުގައި މާކަސް ރަޝްފާޑުގެ ލަނޑުން މެންޗެސްޓަރ ޔުނައިޓެޑުން ލީޑް ނެގިއެވެ. އެކަމަކު ޖެހިގެން އައި މިނެޓުގައި ކެޕްޓަން މާޓިން އޮޑެގާޑް ލަނޑެއް ޖަހައިދީ އާސެނަލްއަށް އެއްވަރު ކޮށްދިނެވެ. ފުރަތަމަ ހާފް ނިމުނީ މިނަތީޖާގައި އޮވެގެންނެވެ.
ދެވަނަ ހާފް ފަށައިގެން އާސެނަލްއަށް އުއްމީދެއް ލިބުނީ 60 ވަނަ މިނެޓުގައި ކައި ހަވާޓްއަށް ޔުނައިޓެޑުގެ ކެސެމީރޯ އާއި ވެން ބިސައްކާ ފައުލް ކުރި ކަމަށް ބަލައި ޕެނަލްޓީއެއް ލުބުމުންނެވެ. އެކަމަކު އުއްމީދުގައި އޮތް އާސެނަލް މާޔޫސްވީ ވީއޭއާރު ބެލުމަށްފަހު އެއީ ޕެނަލްޓީއެއް ނޫން ކަމަށް ރެފްރީ ނިންމުމުންނެވެ.
އާސެނަލްއަށް ދެވަނަ ހާފުގައި ލިބުނު ފުރުސަތުތަކުގެ ބޭނުން ނުކުރެވި އުޅެނިކޮށް 88 މިނެޓުގައި އާޖެންޓީނާގެ އުއްމީދީ ވިންގަރ ގާނާޗޯގެ ލަނޑުން ޔުނައިޓެޑުން ލީޑް ނެގީއެވެ. އެކަމަކު ވީއޭއާރު ބެލުމަށްފަހު ރެފްރީ ނިންމީ ލަނޑު ޖެހުމުގެ ކުރިން ގާނާޗޯ ހުރީ އޮފްސައިޑުގައި ކަމަށެވެ.
އާސެނަލް ނަސީބު އަތުގައި ހިފީ މެޗުގެ އިތުރު ވަގުތުގައި ޑެކްލަން ރީސް ޖަހައިދިން ލަނޑުންނެވެ. މިސީޒަނުގައި އާސެނަލްއާ ގުޅުނު ރީސް މިލަނޑު ޖެހީ 95 ވަނަ މިނެޓާއި 43 ވަނަ ސިކުންތުގައެވެ. މިއީ އާސެނަލް އާއި މެންޗެސްޓަރ ޔުނައިޓެޑް ބައްދަލު ކުރި ކުރިމަތިލުންތަކުގެ ތާރިހުގައިވެސް ލީޑް ނެގި ލަނޑު އެންމެ ލަހުން ޖެހި ފަހަރެވެ. އަނެއްކޮޅުން އާސެނަލްއިން މިވަނީ ޔުނައިޓެޑާ ދެކޮޅަށް އެންމެފަހުން ކުޅުނު 6 މެޗްވެސް ބަލިނުވެ ފަރުޖައްސާފައެވެ. މީގެ ތެރެއިން 5 މެޗުން އާސެނަލް މޮޅުވިއިރު، 1 މެޗް ނިމުނީ އެއްވަރު ވެގެންނެވެ.
ލީގުގައި މިހާތަނަށް ގިނަ ޓީމުތަކުން 4 މެޗް ކުޅެފައިވާއިރު ތާވަލުގެ 1 ވަނައިގައި 12 ޕޮއިންޓާއެކު އޮތީ އެންމެފަހުގެ ޗެމްޕިއަން، މެންޗެސްޓަރ ސިޓީއެވެ. ދެވަނައިގައި ދެވަނައިގައި އޮތް ޓޮޓެންހަމް އާއި ތިންވަނައިގައި އޮތް ލިވަޕޫލް އާއި ހަތަރުވަނައިގައި އޮތް ވެސްޓް ހޭމް ޔުނައިޓެޑް އަދި ފަސްވަނައިގައި އޮތް އާސެނަލްއަށް ލިބިފައި ވަނީ 10 ޕޮއިންޓެވެ.
