ނިއުޓްރަލް ދަނޑުތަކުގައި ހަތް އަހަރު ވަންދެން ވާދަކުރުމަށް ފަހު ކްލަބް ޓީމުތަކުގެ މެދުގައި އަމިއްލަ ދަނޑުގައި ކުޅޭ ފުޓްބޯޅަ މެޗުތައް އަލުން ފެށުމަށް ސައުދީ އަރަބިއްޔާ އާއި އީރާނުން އެއްބަސްވުމަކަށް އައިސްފި އެވެ.
ހޯމް އެންޑް އަވޭ އުސޫލުން ސައުދީ އާއި އިރާން ކްލަބުތައް އަލުން މެޗުތައް ކުޅެން އެއްބަސްވެފައިވާކަން ހާމަކޮށް އިއްޔެ އޭއެފްސީން ނެރެނު ބަޔާނުގައި ބުނީ މިއީ ސައުދީ އާއި އިރާނުގެ ފުޓްބޯޅަ އިތުރަށް ފޯރިގަދަކޮށް ސަޕޯޓަރުންނާއި ކުޅުންތެރިން އިތުރަށް ޝައުގުވެރި ކުރުވަން އެދެގައުމުން ނިންމި ނިންމުމެއް ކަމަށެވެ.
"ސައުދީ އާއި އިރާނުގެ މިނިންމުމަކީ ފުޓްބޯޅަ ކޮމިއުނިޓީތަކުގެ މެދުގައި ގާތް ގުޅުންތަކެއް ގާއިމްކޮށް، ކްލަބުތަކަށް އަމިއްލަ ދަނޑުގައި މެޗުތައް ބާއްވައި، ރަށުން ބޭރުގެ ދަނޑުތަކަށް ޒިޔާރަތްކޮށް، ސަޕޯޓަރުންނާއި ކުޅުންތެރިންނަށް އިތުރު ޝައުގުވެރި އަދި ފޯރިގަދަ ތަޖުރިބާއެއް އުފެއްދުމަށް އެހީތެރިވެދޭނެ ފިޔަވަޅެކެވެ އެއްގޮތަކަށް” އޭއެފްސީން ނެރުނު ބަޔާނެއްގައި ބުނެފައިވެ އެވެ.
ސައުދީ އާއި އިރާނުން ނިއުޓްރަލް ދަނޑުތަކުގައި ވާދަކުރަން ޖެހުނީ 2016 ވަނަ އަހަރު ޑިޕްލޮމެޓިކް ކުޅުން ދެފަރާތުން ކަނޑާލުމުންނެވެ. އެކަމަކު މިދިޔަ މަހު ޗައިނާ ކުރި މަސައްކަތުން އަލުން ސައުދީ އަރަބިއްޔާ އާއި އީރާނުން ވަނީ ޑިޕްލޮމެޓިކް ގުޅުން ގާއިމްކޮށް އެއްގައުމު އަނެއްގައުމުގައި އެމްބަސީ ހުޅުވާފައެވެ.
އޭއެފްސީ ޗެމްޕިއަންސް ލީގުގެ ސީޒަން ސެޕްޓެމްބަރު މަހުގެ 18 ވަނަ ދުވަހު ފެށުމަށް ހަމަޖެހިފައިވާއިރު، ފުރަތަމަ ބުރުގައި މަޝްހޫރު ކްރިސްޓިއާނޯ ރޮނާލްޑޯ ކުޅެމުން އަންނަ އަލް ނަސްރު ބައްދަލުކުރާނީ އީރާނުގެ ޕާސެޕޮލިސްއާ އެވެ.
ސައުދީގެ ކްލަބް އަލް އިއްތިހާދު އޮކްޓޯބަރު މަހުގެ ދެވަނަ ދުވަހު އީރާނުގެ ސެޕަހާންއާ ދެކޮޅަށް ކުޅެން ހަމަޖެހިފައިވާއިރު، ސައުދީ ކްލަބް އަލް ހިލާލް އާއި އީރާނުގެ ނަސާޖީ މަޒަންދަރާން ބައްދަލުކުރަން ހަމަޖެހިފައިވަނީ އަންނަ އޮކްޓޯބަރު މަހުގެ ތިން ވަނަ ދުވަހު އެވެ.
