މިއަހަރުގެ ޑިސެމްބަރު 22-12 އަށް ސައުދީ އަރަބިއްޔާގައި ބޭއްވުމަށް ހަމަޖެހިފައިވާ ފީފާ ކްލަބް ވަރލްޑް ކަޕުގައި، މަޝްހޫރު ކަރީމް ބެންޒީމާ ކުޅެމުން އަންނަ އަލް-އިއްތިހާދް ފައިނަލުގެ ކުރިން ޔޫރަޕުގެ ޗެމްޕިއަން މެންޗެސްޓަރ ސިޓީއާ ކުޅެން ނުޖެހޭނެކަން ޔަގީން ވެއްޖެއެވެ.
ކްލަބް ވަރލްޑް ކަޕުގެ ގުރު އިއްޔެ ނެގިއިރު، ސައުދީގެ ޗެމްޕިއަނުންގެ ހައިސިއްޔަތުން ފުރަތަމަ ބުރުގައި އިއްތިހާދު ބައްދަލު ކުރާނީ އޯޝޭނިޔާގެ ޗެމްޕިއަން އޮސްޓްރޭލިޔާގެ އަކްލޭންޑާއެވެ. މިމެޗުން އިއްތިހާދް މޮޅުވެއްޖެނަމަ ދެވަނަ ބުރުގައި އިއްތިހާދް ބައްދަލު ކުރަންޖެހޭނީ އެފްރިކާގެ ޗެމްޕިއަން، މިސްރުގެ އަލް އަހްލީއާއެވެ. މިމެޗުން މޮޅުވެއްޖެނަމަ ސެމީފައިނަލުން ޖާގަ ލިބޭނެއެވެ. ސެމީގައި ބައްދަލު ކުރަންޖެހޭނީ ދެކުނު އެމެރިކާގެ ޗެމްޕިއަންކަން ހޯދާ ކްލަބާއެވެ.
ދެވަނަ ބުރުގެ ދެވަނަ މެޗުގައި ބައްދަލު ކުރާނީ އޭޝިޔާގެ ޗެމްޕިއަން ޖަޕާނުގެ އުރްވާ ރެޑްސް އާއ އުތުރު އެމެރިކާގެ ޗެމްޕިއަން މެކްސިކޯގެ ކްލަބް ލިއޯންއެވެ. މިމެޗުން މޮޅުވާ ޓީމެއް ބައްދަލު ކުރަންޖެހޭނީ ސެމީފައިނަލުގައި ވަރުގަދަ މެންޗެސްޓަރ ސިޓީއާއެވެ.
ކްލަބް ވަރލްޑް ކަޕުގެ ހުރިހާ މެޗުތަކެއްވެސް ކުޅުމަށް ހަމަޖެހިފައި ވަނީ ސައުދީގެ ޖިއްދާގައެވެ. މިއީ ސައުދީގައި ކްލަބް ވަރލްޑް ކަޕް ބާއްވާ ފުރަތަމަ ފަހަރެވެ.
