ރަހްމަތްތެރިކަމުގެ މެޗެއްގައި ޖަޕާނު އަތުން 4-1 އިން ބަލިވިތާ އެއްދުވަސް ނުވެ އުޅެނިކޮށް ޖަރުމަނު ކޯޗް ކަމުގެ މަގާމުން ހަންސީ ފްލިކް ވަކިކޮށްފިއެވެ.
ފްލިކް ވެގެން މިދިޔައީ ޖަރުމަނު ގައުމީ ފުޓްބޯޅަ ޓީމުގެ ތާރިހުގައި މަގާމުން ވަކިކުރި ފުރަތަމަ ކޯޗަށެވެ.
ބަޔާން މިޔުނިކާއެކު ގިނަ ކާމިޔާބީތަކެއް ހޯދި ފްލިކުގެ އިރުޝާދުގެ ދަށުން ޖަރުމަނުން ކުޅުނު 25 މެޗުގެ ތެރެއިން މޮޅުވީ އެންމެ 12 މެޗުންނެވެ. އަދި އެންމެފަހުން ކުޅުނު 5 މެޗުގެ ތެރެއިން 4 މެޗުން ވަނީ ބަލިވެފައެވެ. މިދިޔަ އަހަރު ގަތަރުގައި އޮތް ވަރލްޑް ކަޕް ގްރޫޕް ސްޓޭޖުންވެސް ޖަރުމަނު ކެޓީ ފްލިކް ކޯޗަކަށް ހުއްޓައެވެ. އެފަހަރުވެސް ގްރޫޕް ސްޓޭޖުގައި ޖަޕާން އަތުން ޖަރުމަނު ބަލިވިއެވެ.
ފްލިކް މަގާމުން ވަކިކުރުމަށްފަހު ޖަރުމަނު އެފްއޭގެ ރައީސް ބާންޑް ނިއެންޑޯފް ވިދާޅުވީ އެފްއޭގެ އެގްޒެކްޓިވް ކޮމިޓީއަށް އެއްބަސްވެވުނީ ޖަރުމަނު ގައުމީ ޓީމަށް އައުޚިޔާލްތަކާއެކު އައުމޫނެއް ބޭނުންވާ ކަމަށެވެ.
ފްލިކުގެ ބަދަލުގައި ވަގުތީ ގޮތުން ޖަރުމަނު ގައުމީ ޓީމް ހަވާލް ކޮށްފައި ވަނީ ކުރީގެ ފޯވާޑް ރުޑީ ވޮލާ،63، އެވެ. ވޮލާ ވަނީ 04-2000 އަށް ޖަރުމަނު ގައުމީ ޓީމަށް އިރުޝާދު ދީފައެވެ.
