ވަރލްޑް ކަޕް ކޮލިފައިންގައި ރޭ، ކެޕްޓަން ލިއޮނަލް މެސީ ނުލައި ނިކުމެ ބޮލީވިޔާގެ މައްޗަށް ދުނިޔޭގެ ޗެމްޕިއަން އާޖެންޓީނާއިން 3-0 އިން ކުރި ހޯދައިފިއެވެ.
ކަނޑުގެ ސަތަހައަށްވުރެ 11،932 ފޫޓް މަތީގައިވާ ބޮލީވިޔާގެ އެސްޓާޑިއޯ ހާނަންޑޯ ސައިލްސް ދަނޑުގައި ކުޅުނު މިމެޗުގައި އާޖެންޓީނާއިން ލީޑް ނެގީ 31 ވަނަ މިނެޓުގައި އެންޒޯ ފެނާންޑޭޒް ކާމިޔާބު ކުރި ލަނޑުންނެވެ. އާޖެންޓީނާއަށް ނަސީބު އެހީވީ 39 ވަނަ މިނެޓުގައި ބޮލީވިޔާގެ ރޮބާޓޯ ފެނާންޑޭޒްއަށް 39 ވަނަ މިނެޓުގައި ރަތްކާޑް ދައްކާ ދަނޑުން ފޮނުވާލުމުންނެވެ.
އޭގެ 3 މިނެޓް ފަހުން ޑިފެންޑަރު ނިކޮލަސް ޓަގްލިއަފިކޯގެ ލަނޑުން އާޖެންޓީނާއިން ލީޑް ފުޅާ ކުރިއެވެ. މެޗް ކޮންޓްރޯލް ކޮށްގެން ކުޅެ ގިނަ ހަމަލާތަކެއް އުފެއްދި އާޖެންޓީނާގެ ތިންވަނަ ލަނޑު، 83 ވަނަ މިނެޓުގައި ކާމިޔާބު ކޮށްދިނީ ވިންގަރ ނިކޮލަސް ގޮންޒާލޭސްއެވެ.
މިމެޗް ކުޅުނު އެސްޓާޑިއޯ ހާނަންޑޯ ސައިލްސް ދަނޑަކީ މުޅި ދުނިޔޭގައިވެސް ކަނޑުގެ ސަތަހައަށްވުރެ މަތީގައިވާ ދަނޑުތަކުގެ ތެރެއިން އެންމެ ފާހަގަކޮށްލެވޭ އެއްދަނޑެވެ. މިދަނޑުގައި ކުޅޭއިރު އޮކްސިޖަންގެ މައްސަލަ އެހެން ގައުމުތަކުގެ ކުޅުންތެރިންނަށް ދިމާވުމަކީ އާންމު ކަމެކެވެ. އާޖެންޓީނާ އާއި ބްރެޒިލް ވަނީ މީގެ ކުރިން ވަނީ ބޮލީވިޔާ އަތުން މިދަނޑުގައި ތަފާތު ބޮޑުކޮށް ބަލިވެފައެވެ.
މިމެޗަށް ޓީމާއެކު ދަތުރުކޮށް ބެންޗުގައިވެސް މެސީ އިނެވެ. މެސީ މިމެޗަށް ނުނެރުމުގެ އަސްލަކީވެސް ސައިކޮލޮޖިކަލީ އޭނާ ރަނގަޅު ހާލަތެއްގައި ބެހެއްޓުމަށް ނިންމި ނިންމުމެއް ކަމަށް މީޑިޔާ ރިޕޯޓުތައް ބުނެއެވެ. މީގެ ކުރިން ކުޅުނު ބައެއް މެޗުތަކުގައި ނޭވާލަން އުނދަގޫވުމުގެ ސަބަބުން މެސީ ބަދަލުކޮށްފައިވެއެވެ.
ދެކުނު އެމެރިކާ ސަރަަހައްދުގެ ކޮލިފިކޭޝަނުގައި ކޮންމެ ގައުމަކުން 2 މެޗް ކުޅެފައިވާއިރު ތާވަލުގެ އެއްވަނައިގައި އާޖެންޓީނާ އޮތީ 6 ޕޮއިންޓާއެކުއެވެ. ދެވަނައިގައި 4 ޕޮއިންޓާއެކު އޮތީ ކޮލަމްބިއާއެވެ. ކޮލިފިކޭޝަނުގައި ބްރެޒިލް މިހާރު ޕެރޫއާ ދެކޮޅަށް ކުޅޭ މެޗުން މޮޅުވެއްޖެނަމަ ޕޮއިންޓުގެ ގޮތުން ބްރެޒިލް އާއި އާޖެންޓީނާ އެއްވަރުވާނެއެވެ.
