ރިޔާސީ އިންތިހާބުގައި އެމަނިކުފާ ވާދަކުރައްވަން ނުކުމެ ތިއްބެވި ބޭފުޅުންނަކީ ރާއްޖެ ތަރައްގީކުރުމަށް މި ސަރުކާރަށް ދައްޗާއި އުނދަގޫ ޖެއްސި ބޭފުޅުން ކަމަށް އެމްޑީޕީގެ ރިޔާސީ ކެންޑިޑޭޓް، ރައީސް އިބްރާހިމް މުހައްމަދު ސާލިހު ވިދާޅުވެއްޖެއެވެ.
ރައީސް ސާލިހު މިހެން ވިދާޅުވީ އެމްޑީޕީން ރޭ ބޭއްވި ގަލޮޅު ކަންމަތީ ޖަލްސާގައި ވާހަކަފުޅުދައްކަވަމުންނެވެ.
ޖަލްސާގައި ދެއްކެވި ވާހަކަފުޅުގައި، އެމަނިކުފާނު ވެރިކަމަށް ވަޑައިގެން މުޅި ރާއްޖެ ތަރައްގީކުރުމަށް ގިނަ ކަންތައްތަކެއް ކުރައްވަން ޖެހިވަޑައިގެންނެވިކަން ހާމަކުރައްވައި ރައީސް ސާލިހު ވިދާޅުވީ އެގޮތުން އޭރު ރާއްޖެތެރޭގެ ހާލަތު އޮތް ގޮތް ވެސް ހަނދާނަށް ގެންނަން އެބަޖެހޭ ކަމަށެވެ.
ރައީސް ވިދާޅުވީ އެތައް ރަށެއްގައި ކަރަންޓުގެ ހިދުމަތް އަލުން ގާއިމުކުރެއްވުމާއި އެތަކެއް އިންޖީނުގެތަކާއި އިންޖީނާއި ނެޓްވޯކުތައް އެޅުއްވިއިރު އެތައް ރަށެއްގައި ފެނާއި ނަރުދަމާގެ ނިޒާމު ގާއިމުކުރައްވަން ޖެހިވަޑައިގެންނެވިކަމަށެވެ. އަދި އެހާމެ ގިނަރަށްތަކެއްގެ ލަފާފުރުމުގެ ދަތިކަމާއި ސިއްހީ ހިދުމަތްތަކުގެ ހާލަތު އޮތް ދެރަގޮތް ބަދަލު ކުރައްވަން ޖެހިވަޑައިގެންނެވި ކަމަށެވެ.
ރައީސް ވިދާޅުވީ އޭރު މާލެއަށް ދިމާވެފައި އޮތް ދަތިތައް ވެސް އެނގޭނެ ކަމަށާއި މާލޭގެ ރައްޔިތުންނަށް ދިމާވެފައި އޮތް އެންމެ ބޮޑު ދައްޗަކީ ބޯހިޔާވަހިކަމުގެ ދަތިތައް ކަމަށެވެ. އަދި އެއާއެކުގައި ލިބޭ އާމްދަނީން ހަމަޖެހިގެން ދިރިއުޅެވޭނެ ގޮތެއް ނެތުމަކީ ވެސް ދިމާވެފައިވާ ދައްޗެއް ކަމަށް އެމަނިކުފާނު ވިދާޅުވިއެވެ.
ރައީސްގެ ވާހަކަފުޅުގައި ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒަށް ފާޑުވިދާޅުވަމުން ވެރިކަމަށް ވަޑައިގެން ގާކޮށްޓާއި އަރަބިއްޔާގެ ފުލެޓުތަކުގެ ކުލި ކުޑަކޮށްދެއްވާނަމޭ ވިދާޅުވާ އިރު، އެމްޑީޕީގެ ފުރަތަމަ ސަރުކާރުން ކުޑަ ކުއްޔެއް ހަމަޖައްސާފައިވަނިކޮށް، އެ ކުލި ބޮޑުކުރީ ހައުސިން މިނިސްޓަރުގެ މަގާމުގައި މުއިއްޒު ހުންނަވައިގެންކަން ވަނީ ހާމަކުރައްވާފައެވެ. އަދި އެ ހަދާ ދޮގުތަކާ މެދު ރައްޔިތުން ވިސްނަން ޖެހޭ ކަމަށްވެސް ރައީސް ސާލިހު ވަނީ ވިދާޅުވެފައެވެ.
