މެޗުގެ ތިންވަނަ މިނެޓުގައި ޑިފެންޑަރު ނިކޮލަސް އޮޓަމެންޑީ ކާމިޔާބު ކުރި ހަމައެކަނި ލަނޑުން ޕެރަގުއޭ 1-0 އިން ބަލިކޮށް ވަރލްޑް ކަޕް ކޮލިފައިން ދެކުނު އެމެރިކާ ޒޯނުގެ އެއްވަނައަށް އާޖެންޓީނާ ޖެހިލައިފިއެވެ.
އާޖެންޓީނާ މަޝްހޫރު އެސްޓާޑިއޯ މަސް މޮނިއުމެންޓަލް ސްޓޭޑިއަމްގައި ކުޅުނު މިމެޗުގައި ކެޕްޓަން ލިއޮނަލް މެސީ ކުޅެން ނިކުތީ ދެވަނަ ހާފުގެ ކުރީކޮޅުއެވެ. މުޅި މެޗް ކޮންޓްރޯލްކޮށްގެން އާޖެންޓީނާއިން ކުޅުނުއިރު، ޕެރަގުއޭ ގޯލަށް އަމާޒުކޮށް އާޖެންޓީނާއިން 15 ހަމަލާ ފޮނުވާލިއެވެ.
އެންމެފަހުގެ ވަރލްޑަ ކަޕް ޗެމްޕިއަން އާޖެންޓީނާއާ ދެކޮޅަށް ޕެރަގުއޭއިން ރޭވުންތެރި ޑިފެންސިވް ގޭމެއް ކުޅުނުއިރު، ލަނޑު ޖަހާނެ ރަނގަޅު ދެފުރުސަތެއް އެގައުމަށްވެސް ލިބުނެވެ. އެކަމަކު މީގެ ތެރެއިން ގޯލަށް އަމާޒުކޮށްލެވުނީ އެންމެ ހަމަލާއެކެވެ.
މިމޮޅާއެކު ދެކުނު އެމެރިކާ ޒޯނުގެ އެއްވަނައިގައި އާޖެންޓީނާ އޮތީ މިހާތަނަށް ކުޅުނު 3 މެޗުންވެސް މޮޅުވެ 9 ޕޮއިންޓާއެކުއެވެ. ދެވަނައިގައި 7 ޕޮއިންޓާއެކު އޮތީ ބްރެޒިލެވެ. ތިންވަނައިގައި ކޮލަމްބިއާ އޮތީ 5 ޕޮއިންޓާއެކުއެވެ.
