ބ. ކަމަދޫ ބަނދަރު ތަރައްޤީ ކުރުމުގެ މަޝްރޫޢުގެ މަސައްކަތުގެ 78 އިންސައްތަ މިހާރު ވަނީ ފުރިހަމަކުރެވިފައިވާ ކަމަށް މޯލްޑިވްސް ކޮންޓްރެކްޓިންގް ކުންފުނި (އެމްޓީސީސީ)ން ބުނެފިއެވެ.
އެ ކުންފުނިން ބުނީ އެ ރަށުގެ ޖެޓީ ހެދުމުގެ މަސައްކަތް މިހާރު ވަނީ ނިމިފައިކަމަށާއި މަސައްކަތަށް ބޭނުންވާ ބޮޑު ހިލައިގެ ހަތަރުވަނަ ޝިޕްމެންޓްވެސް މިހާރު ވަނީ ޕްރޮޖެކްޓް ސައިޓަށް ގެންދެވިފައި ކަމަށެވެ.
މި މަޝްރޫއުގެ ދަށުން:
- 30,122 ކިއުބިކް މީޓަރުގެ ސަރަހައްދެއްގެ ބަނދަރު ފުންކުރުން
- 187 މީޓަރުގެ ސަރަހައްދެއްގައި ބޭރުތޮށި ލުން
- 656 މީޓަރުގެ ސަރަހައްދެއްގައި ރިވެޓްމެންޓް ޖެހުން
- 402 މީޓަރުގެ ސަރަހައްދެއްގައި އެއްގަމުތޮށި ލުމާއި، ދެ ރޭމްޕް ހެދުން
- 80 މީޓަރު ދިގު 1.5 މީޓަރު ފުޅާ ކޮންކްރީޓް ޖެޓީއެއް ހެދުން
- 1,810 އަކަ މީޓަރުގެ ސަރަހައްދެއްގައި ހާބަރ ޕޭވްމަންޓް ހެދުން
- ނެރު ބައްތި އާއި ބަނދަރު ބައްތި ހަރުކުރުން
- އަދި މޫރިންގ ރިންގ ހަރުކުރުމުގެ މަސައްކަތް ހިމެނެއެެވެ.
މި މަޝްރޫއަކީ 51.4 މިލިއަން ރުފިޔާގެ މަޝްރޫއެކެވެ.
