ރައްޔިތުންގެ ސުވާލުތަކާއި ކަންބޮޑުވުންތަކާ ގުޅޭގޮތުން މަޝްވަރާކުރުމަށް ބާއްވާ ޖަޒީރާ ސައްލާގެ ފުރަތަމަ ޕްރޮގްރާމް އަންނަ ބުދަ ދުވަހު ފެށުމަށް ނިންމައިފިއެވެ.

މި ސައްލާގައި މަޝްވަރާ ކުރަން ހަމަޖެހިފައިވަނީ ސަރުކާރުން ކޮވިޑު-19 އާއި ގުޅިގެން އަމަލުކުރަމުންދާ ގޮތާއި މެދުގައެވެ. ސަރުކާރުގެ ފަރާތުން މި ސައްލާގައި ބައިވެރިވެވަަޑައިގަންނަވަނީ ރައީސް އޮފީހުގެ ތަރުޖަމާނު މަބްރޫކް އަޒީޒް އަދި ހެލްތު އެމަޖެންސީ އޮޕަރޭޝަންސް ސެންޓަރުގެ ތަރުޖަމާނު ޑރ.ނަޒްލާ ރަފީގެވެ.

މި ސައްލާ އަށް ސޯޝަލް މީޑިއާގެ ހުރިހާ ޕްލެޓްފޯމެއް މެދުވެރިކޮށް ސުވާލު ފޮނުވޭއިރު، ބުދަ ދުވަހުގެ މެންދުރު ފަހު 2:30ގެ ކުރިން ސުވާލުތައް ފޮނުވަން ޖެހެއެވެ.

ރައީސް އޮފީހުގެ ތަރުޖަމާން މަބްރޫކް އަޒީޒް "އައްޑޫލައިވް" އަށް މައުލޫމާތު ދެއްވަމުން ވިދާޅުވީ "ޖަޒީރާ ސައްލާ"ގެ ބޭނުމަކީ، އެކިކަންކަމުގައި ސީދާ ރައްޔިތުންނާއި ވާހަކަ ދެއްކޭނެ މަގެއް ހޯދުންކަމަށެވެ.

މަބްރޫކް ވިދާޅުވީ "ޖަޒީރާ ސައްލާ"ގެ ސެޝަންތައް ކުރިއަށްދާނީ އެ ސެޝަންއަކަށް ހާއްސަ ކުރާ ޓޮޕިކަކާއި ގުޅޭ ހާއްސަ ފަރާތްތައް ހިމަނައިގެން ކަމަށާއި، އެގޮތުން ލިބޭ ހިޔާލުތަކާއި ޝަކުވާތަކަށް ޖަވާބު ދިނުމާއި އަދި އިތުރަށް ރަނގަޅުކުރުމަށް ކުރެވޭނެ ކަންކަމާއި ގުޅޭގޮތުން މަޝްވަރާ ކުރެވޭނެ ކަމަށެވެ.

މީގެ އިތުރުން މަބްރޫކް ވިދާޅުވީ، "ޖަޒިރާ ސައްލާ"ގެ ބޭނުމަކީ ހުރިހާ ހިޔާލުތައް އަޑުއެހުންކަމަށެވެ.