މާރޗް މަހުން ފެށިގެން އެއާ އެމްބިއުލާންސްގެ ޚިދުމަތް ރާއްޖޭގައި ފެށުމަށް ނިންމާފައިވާ ކަމަށް ރައީސް އޮފީހުން ވިދާޅުވެއްޖެއެވެ.
މިއަދު ރައީސް އޮފީހުން ބޭއްވި ނޫސްވެރިންގެ ބައްދަލުވުމުގައި ރައީސް އޮފީހުގެ މިނިސްޓަރ ޢަބްދުﷲ ނާޒިމް އިބްރާހީމް ވިދާޅުވީ ހެލްތް މިނިސްޓްރީގެ ހުށަހެޅުމާއި އެއްގޮތަށް އެއާ އެމްބިއުލާންސް ތައާރަފް ކުރުމަށްޓަކައި ވާން ޖެހޭ ހުރިހާ ތައްޔާރީތައް ވާން ފަށާފައިވާ ކަމުގައިއެވެ.
އެގޮތުން، އެއާ މޯލްޑިވްސްއާއި ގުޅިގެން ދެ އެއާ އެމްބިއުލާންސެއް ތައްޔާރުކޮށް، ހިދުމަތް ދެވޭނެ އިންތިޒާމު ހަމަޖެއްސުމުގެ މަސައްކަތް ކުރިއަށްދާ ކަމަށް އޭނާ ވިދާޅުވިއެވެ.
ނާޒިމް ވިދާޅުވީ، މި މަޝްރޫޢު ކުރިއަށް ގެންދާނީ މިހާރުވެސް އެމަޖެންސީ އެމްބިިއުލާންސް ޚިދުމަތް ދިނުމަށް ހެލްތު މިނިސްޓްރީން ކަނޑައެޅިފައިވާ ޑިޕާޓްމަންޓުން ކަމަށާއި ހެލްތް މިނިސްޓްރީން ހުށަހަޅާފައިވާގޮތަށް އަންނަ އަހަރު މާރޗް 1 ވަނަ ދުވަހުން ފެށިގެން އެއާ އެމްބިއުލާންސްގެ ޚިދުމަތް ފަށަން ވަޒީރުންގެ މަޖިލީހުން ނިންމާފައިވާ ކަމަށެވެ.
