އާޖެންޓީނާގެ ސަތާރަ އަހަރުގެ އުއްމީދީ އެޓޭކިންގ މިޑްފީލްޑަރު ކްލައުޑިއޯ އަޗެވޭރީ ގެންދިޔުމުގެ ރޭހުގައި މަޝްހޫރު ރެއާލް މެޑްރިޑާއި ބާސެލޯނާ ފަހަތަށް ޖައްސާލުމަށްފަހު މެންޗެސްޓަރ ސިޓީއިން ކުރި ހޯދައިފިއެވެ.
ސްޕެއިނުގެ މީޑިޔާ ރިޕޯޓުތައް ބުނާ ގޮތުގައި ރިވަޕްލޭޓަށް ކުޅެމުން އަންނަ އަޗެވޭރީ ބޭނުން ވަނީ ސިޓީއަށް ބަދަލުވުމަށެވެ. އަދި އޭނާއަށް 22 މިލިޔަން ޑޮލަރުގެ ޓްރާންސްފާ ފީއެއް ދެއްކުމަށް ސިޓީ އޮތީ ތައްޔާރަށް ކަމަށްވެއެވެ. ބާސެލޯނާއިން އަޗެވޭރީއަށް 30 މިލިޔަން ޑޮލަރު ޓްރާންސްފާ ފީއެއް ދެއްކުމަށް ތައްޔާރަށް އޮތް ކަމަށްވެއެވެ. އެކަމަކު އަޗެވޭރީ ގަވާނީ ސިޓީއިން ހުށަހަޅާފައިވާ ޕްރޮޖެކްޓަށެވެ.
އަޗެވޭރީ ދުނިޔޭގެ މީޑިޔާގެ ސަމާލުކަން ހޯދީ މިމަހު އިންޑޮނޭޝިޔާގައި ނިމުނު 17 އަހަރުން ދަށުގެ ވަރލްޑް ކަޕުގައި ދެއްކި މޮޅު ކުޅުމުގެ ސަބަބުންނެވެ. އަޗެވޭރީ ވަނީ ކުއާޓާފައިނަލުގަައި ވާދަވެރި ބްރެޒިލް ކޮޅަށް ހެޓްރިކްވެސް ހަދާފައެވެ.
ރިވަޕްލޭޓުން ބުނެފައި ވަނީ 2024 ވަނަ އަހަރު އެއްކޮށް އަޗެވޭރީގެ ބޭނުން އެކްލަބަށް ބޮޑު ކަމަށާއި ސިޓީއަށް އަޗެވޭރީ ވިއްކާލިނަމަވެސް، ލޯނު އެއްބަސްވުމެއްގެ ދަށުން އަޗެވޭރީ ރިވަޕްލޭޓުގައި ބެހެއްޓެން ކުރެވެން އޮތް ހުރިހާ ކަމެއް ކުރާނެ ކަމަށެވެ.
