އެސްޓަންވިލާއިން ފުރަތަމަ 26 މިނެޓް ތެރޭގައި ދެލަނޑު ޖަހައި ލީޑް ނަގާފައި ވަނިކޮށް، ދެވަނަ ހާފުގައި ތިން ލަނޑު ޖަހައިގެން 3-2 އިން މޮޅުވެ މަޝްހޫރު މެންޗެސްޓަރ ޔުނައިޓެޑުން ފެންވަރު ސާބިތު ކޮށްދީފިއެވެ.
ޔުނައިޓެޑުގެ އޯލްޑް ޓްރެފޯޑުގައި ކުޅުނު މިމެޗުގައި އެސްޓަންވިލާއިން ލީޑް ނެގީ 21 ވަނަ މިނެޓުގައި ޖޯން މެކްގިންއެވެ. އޭގެ ފަސްމިނެޓް ފަހުން ލީޑް ފުޅާ ކޮށްދިނީ ލީންޑަރ ޑެންޑޮންކާއެވެ. މިއާއެކު ޔުނައިޓެޑުގެ ބައެއް ސަޕޯޓަރުން ދަނޑުން ނިކުމެގެން ދިޔަތަންވެސް ފެނުނެވެ.
ވަރަށް ވާދަވެރި ކުޅުމެއް ފެނިގެންދިޔަ މިމެޗުގެ ދެވަނަ ހާފުގައި އެސްޓަންވިލާ ހަމަބިމަށް ތިރިކުރީ އާޖެންޓީނާގެ ވިންގަރ އަލެހެންދްރޯ ގާނާޗޯ މެޗުގެ 59 އަދި 71 ވަނަ މިނެޓުގައި ޖެހި ލަނޑާއި ޑެންމާކުގެ ފޯވާޑް ހޮޖްލަންޑް 82 ވަނަ މިނެޓުގައި ކާމިޔާބު ކުރި ލަނޑުންނެވެ.
މިމެޗަށް ނިކުތްއިރު، ލީގުގައި ޔުނައިޓެޑުން އެންމެފަހުން ކުޅުނު 3 މެޗުންވެސް މޮޅުވެފައެއް ނުވެއެވެ. އަނެއްކޮޅުން މިމެޗަކީ ދެލަނޑުގެ ލީޑެއް ނެގުމަށްފަހު މިސީޒަނުގައި އެސްޓަންވިލާ ބަލިވި ފުރަތަމަ ފަހަރެވެ. ދެލަނޑުގެ ލީޑެއް ލިބުމަށްފަހު އެޓީމު އެންމެފަހުން ބަލިވެފައި ވަނީ 2022 ވަނަ އަހަރުގެ މެއި މަހު މެންޗސްޓަރ ސިޓީ އަތުން 3-2 އިންނެވެ.
މިމެޗުން ބަލިވުމުގެ ސަބަބުން ތާވަލުގެ އެއްވަނައިގައި އޮތް ލިވަޕޫލްއާ އެއްވަރު ކުރަން ލިބުނު ފުރުސަތު އެސްޓަންވިލާއަށް ވަނީ ގެއްލިފައެވެ. އެޓީމު ތާވަލުގެ ތިންވަަނައިގައި އޮތީ 39 ޕޮއިންޓާއެކުއެވެ. ލިވަޕޫލް އެއްވަނައިގައި އޮތީ 42 ޕޮއިންޓާއެކުއެވެ. ދެވަނައިގައި އާސެނަލް އޮތީ 40 ޕޮއިންޓާއެކުއެވެ. ޔުނައިޓެޑް ތާވަލުގެ 6 ވަނައިގައި އޮތީ 31 ޕޮއިންޓާއެކުއެވެ.
