މަދަނީ ލީޑަރު އަންގް ސަން ސޫކީގެ ސަރުކާރު ވައްޓާލީ، އިތުރު އެއްވެސް ގޮތެއް ނެތި "މަޖުބޫރުވެގެން" ކަމަށް މިޔަންމާގެ އަސްކަރީ ވެރިޔާ، ޖެނެރަލް މިން އަންގް ހްލައިންގް ވިދާޅުވެއްޖެއެވެ.
މިއީ، ހޯމަދުވަހުގެ ފަތިހުގެ ވަތުގެއްގައި މިޔަންމާގެ ވެރިކަމުގެ ހުރިހާ ބާރެއް އަތުލައި ގަތުމަށްފަހު، ޖެނެރަލް މިން އާންމުކޮށް ވާހަކަ ދެއްކެވި ފުރަތަމަ ފަހަރެވެ.
މިޔަންމާގައި އަލަށް އިންތިޚާބު ކުރެވުނު ޕާލަމެންޓް ހޯމަދުވަހުގެ ހެނދު ފުރަތަމަ ޖަލްސާ ބާއްވަން ތައްޔާރުވެފައި ވަނިކޮށް ނުފޫޒުގަދަ އަސްކަރީންވަނީ ފަތިހު ނުކުމެ، މަދަނީ ސަރުކާރުގެ ހުރިހާ ވެރިން ހައްޔަރުކޮށްފައެވެ. އޭގެ ތެރޭގައި، މިޔަންމާގެ ޑިމޮކްރަސީ ލީޑަރު އަންގް ސަން ސޫކީވެސް ހިމެނެއެވެ.
މަދަނީ ސަރުކާރު ވައްޓާލުމަށްފަހު އަސްކަރީން ވެރިކަމުގެ މައްޗަށް އަތްގަދަކޮށް ގާނޫނުހަދާ މަޖިލީހާއި، ޖުޑިޝަރީއާއި އަދި ވެރިކަން ހިންގުމުގެ ބާރުވެސް މިހާރުވަނީ ޖެނެރަލް މިން އަންގް ހްލައިންގާ ހަވާލުކޮށްފައެވެ.
ނަތީޖާއެއްގެ ގޮތުން 10 އަހަރު ފަހުން މިޔަންމާ އަލުން މިވަނީ އަސްކަރީ ވެރިކަމަކަށް އެނބުރި ގޮސްފައެވެ.
އަސްކަރީ މި ކުރި ކަމަކީ "ބަޣާވާތްކުރުން" ކަމަށް އެމެރިކާއިން ރަސްމީގޮތުން ކަނޑައަޅައި، އަސްކަރީންނާ ދެކޮޅަށް ފިޔަވަޅު އަޅަން ތައްޔާރު ވަމުންދާއިރު، އަސްކަރީ ވެރިޔާ ޖެނެރަލް މިން ވިދާޅުވީ، އަސްކަރީން ވެރިކަމުގެ މައްޗަށް ބާރު ހިންގީ "ގާނޫނީ އިމުގެ ތެރެއިން" ކަމަށެވެ.
އަދި އެކަން ކުރެއްވީ، ނޮވެމްބަރުމަހުގެ ތެރޭގައި ބޭއްވި ޕާލަމެންޓް އިންތިޚާބުގައި ހިންގާފައިވާ މަކަރާއި ހީލަތްހެދުމުގެ މައްސަލަތައް އަސްކަރިއްޔާއިން ހުށަހެޅުމުން ސަރުކާރުން އެކަމަށް އެއްވެސް އިޖާބައެއް ނުދިނުމުން ކަމަށްވެސް ޖެނެރަލް މިން ވިދާޅުވެފައި ވެއެވެ.
ޖެނެރަލް މިން އަންގް ހްލައިންގް ވިދާޅުވީ، އަސްކަރީން ވެރިކަމާ ހަވާލުވީ، އެތައް ބައެއްގެ އެދުމަށް އަދި މިވަގުތަށް ގައުމަށް އެންމެ ރަނގަޅުގޮތަކީ އެއީ ކަމަށް ފެނިގެން ކަމަށެވެ.
މިޔަންމާގެ ވެރިކަމަށް އަސްކަރީން އަތްގަދަކުރި މައްސަލަ މުޅި ދުނިޔެއިން ކުށްވެރި ކުރަމުން ގެންދާއިރު، މިމައްސަލާގައި އދގެ ސަލާމަތީ މަޖިލީހުގެ ކުއްލި ޖަލްސާއެއްވެސް ވަނީ ބާއްވާފައެވެ. ނަމަވެސް ޖަލްސާއިން ނިންމިގޮތެއް އަދި ސާފެއް ނުވެއެވެ.
އަސްކަރީން ނުކުމެ މަދަނީ ސަރުކާރު ވައްޓާލުމުން، އަންގް ސަން ސޫކީގެ ގޮވާލުމަށް މިޔަންމާގެ މަގުތަކަށް ނުކުމެ ސޫކީގެ ސަޕޯޓަރުން އިއްޔެ މުޒާހަރާކޮށް އަޑު އުފުލި ނަމަވެސް، އަންގާރަ ދުވަހު މަގުތަކަށް އޮތީ ވަރަށް ހަމަހިމޭންކޮށް ކަމަށް މީޑިއާއިން ބުނެއެވެ.
ސިފައިން ގެންދަނީ ބަރު ހަތިޔަރާއެކު މަގުތަކުގައި ފޯރި މަރަމުންނެވެ.
އަލަށް އިންތިޚާބު ކުރެވުނު ޕާލަމެންޓް މެމްބަރުން މިހާރު ތިބެއްވީ "ގޭބަންދުގަ" އެވެ.
