18 ވަނަ އިންފޯފިޝް ވޯލްޑް ޓޫނާ ޓްރޭޑް ކޮންފަރެންސް އެންޑް އެގްޒިބިޝަން ހުޅުވުމުގެ ގޮތުން ބޭއްވި ހަފްލާ މިނިސްޓަރ އޮފް ފިޝަރީޒް އެންޑް އޯޝަން ރިސޯސަސް އަހްމަދު ޝިޔާމް ޝަރަފުވެރި ކޮށްދެއްވައިފިއެވެ.
ތައިލެންޑްގެ ބެންގެކޮކްގައި ކުރިއަށްދާ އިންފޯފިޝް ވޯލްޑް ޓޫނާ ޓްރޭޑް ކޮންފަރެންސް އެންޑް އެގްޒިބިޝަން ހުޅުވާލުމުގެ ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރ ޝިޔާމް ވަނީ ދިވެހިރާއްޖޭގެ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސިޔާސަތުތަކުގައި މަސްވެރިކަމަށް ދެއްވާފައިވާ އަހައްމިއްޔަތު ކަމަށް އަލި އަޅުއްވާލައްވާފައެވެ.
މިނިސްޓަރ ޝިޔާމް ފާހަގަކުރެއްވި ގޮތުގައި ސަރުކާރުން އަންނަނީ ރޯމަސް އެކްސްޕޯޓު ކުރުން ނިމުމަކަށް ގެނެސް, ދަޅުގައި އަދި ޕައުޗުގައި އެކްސްޕޯޓު ކުރުމުގެ ނިޔަތުގައި ފެކްޓަރީތަކެއް ޤާއިމް ކުރެއްވުމަށް މަސައްކަތް ކުރައްވަމުންނެވެ. މިގޮތުން ޅ.ފެލިވަރު, ފ.ނިލަންދޫ އަދި ގދ.ފިޔޯރީގައި އަޅަމުންދާ ޕްރޮސެސިން ފެކްޓަރީތައް އެޅުމުގެ މަސައްކަތް އަންނަ އަހަރު ނިމުމުގެ ކުރިން ނިމިގެންދާނެ ކަމުގެ ޔަގީންކަން މިނިސްޓަރ ވަނީ ދެއްވާފައެވެ.
މިނިސްޓަރ ޝިޔާމް ވިދާޅުވި ގޮތުގައި ދެމެހެއްޓެނިވި ގޮތެއްގައި އެންމެ ފުރިހަމަކޮށް ކަނޑުމަހުގެ މަސްވެރިކަން ކުރާ ދިވެހިރާއްޖެއަށް ދެން އޮތް މަރުހަލާއަކީ ކާބަން ފޫޓްޕްރިންޓް އެންމެ މަދު ކަނޑުމަހުގެ މަސްވެރިކަން ކުރާ ގައުމަށް ވުމެވެ. މިނިސްޓަރ ފާހަގަކުރެއްވި ގޮތުގައި ކުރިއަށް އޮތް ފަސް އަހަރުގެ ތެރޭގައި މަސްވެރިކަމުގެ ސިނާއަތުގައި މިހާރު ބޭނުން ކުރެވެމުންދާ އިއާދަނުކުރެވޭ ހަކަތައިގެ 35 އިންސައްތަ އިއާދަކުރެވޭ ހަކަތައަށް ބަދަލުކުރުމުގެ މަސައްކަތް ވަނީ ފެށިފައެވެ.
އެކި ގައުމުތަކުން މަސްވެރިކަމުގެ ސިނާއަތާ ގުޅުން ހުރި 500 އަށްވުރެ ގިނަ ބައިވެރިންނާއެކު ކުރިއަށްގެންދާ އިންފޯފިޝް ވޯލްޑް ޓޫނާ ޓްރޭޑް ކޮންފަރެންސް އެންޑް އެގްޒިބިޝަނަކީ މި މަހުގެ 20 ވަނަ ދުވަހުން ފެށިގެން 22 ވަނަ ދުވަހާ ހަމައަށް ކުރިއަށްދާ އެގްޒިބިޝަނެކެވެ.
އިންޓާ ގަވަމެންޓަލް އޮގަނައިޒޭޝަނެއް ކަމުގައިވާ އިންފޯފިޝްއިން ކުރިއަށް ގެންދާ މި އެގްޒިބިޝަނަކީ މަސްވެރިކަމުގެ ސިނާއަތަށް ހެޔޮ ބަދަލުތަކެއް ގެނައުމަށް އެތައް ދޮރެއް ހުޅުވާލަދޭ އެގްޒިބިޝަނެކެވެ.
