އީ-ލަރނިންގ މޮޑަލިޓީ މެދުވެރިކޮށް ކީރިތި ޤުރްއާނާއި ގުޅުންހުރި ދާއިރާތަކުން ކިޔަވައިދިނުމުގެ ހުއްދަ މޯލްޑިވްސް ކޮލިފިކޭޝަންސް އޮތޯރިޓީ (އެމްކިއުއޭ) އިން ދީފައެވެ. މި ނިންމުމަކީ އިސްލާމީ ކަންތައްތަކާބެހޭ ވުޒާރާއާ މަޝްވަރާކުރުމަށްފަހު ނިންމާފައިވާ ނިންމުމެކެވެ.
އެމްކިއުއޭ އިން ނެރުނު ބަޔާނުގައި ވިދާޅުވީ، ކުރިން 24 އޮގަސްޓް 2022 ގައި ޝާއިޢުކުރެވުނު "ގައިޑްލައިންސް ފޮރ އީ-ލަރނިންގ" ގެ 11 ވަނަ މާއްދާގައި ޤުރްއާނާއި ގުޅުންހުރި ދާއިރާތައް އީ-ލަރނިންގ މެދުވެރިކޮށް ކިޔަވައިނުދެވޭނެ ކަމަށް ބަޔާންކޮށްފައިވީ ނަމަވެސް، މިހާރު އެ ނިންމުން ވަނީ ބަދަލުކޮށްފައި ކަމަށެވެ.
އިސްލާމީ ކަންތައްތަކާބެހޭ ވުޒާރާގެ ލަފާގެ މަތިން، މިހާރުން މިހާރަށްވެސް މަޢާނިލް ޤުރްއާނާއި ޢުލޫމުލް ޤުރްއާން ފަދަ މޮޑިއުލްތައް އީ-ލަރނިންގ މެދުވެރިކޮށް ކިޔަވައިދެވިދާނެ ކަމަށް އެމްކިއުއޭ އިން ވަނީ އަންގާފައެވެ. އަދި ވަކި އުސޫލުތަކެއްގެ ދަށުން ތިލާވަތާއި ޙިފްޡު ފަދަ މާއްދާތައްވެސް އޮންލައިންކޮށް ކިޔަވައިދެވިދާނެ ކަމަށް ބަޔާންކޮށްފައިވެއެވެ.
މި ހުއްދަ ދެވިފައިވަނީ އިމްތިޙާނުތައް ކުރިއަށް ގެންދަންވާނީ ސީދާ ބައްދަލުވެގެން (ފޭސް-ޓު-ފޭސް) ކަމަށް ޝަރުޠުކޮށްފައެވެ.
އެމްކިއުއޭއިން ވަނީ ޤުރްއާނާއި ގުޅުންހުރި ދާއިރާތަކުގެ ޕްރޮގްރާމްތައް އީ-ލަރނިންގ މޮޑަލިޓީގެ ދަށުން ކިޔަވައިދިނުމަށް ޝައުޤުވެރިވާ މަތީ ތަޢުލީމުދޭ މަރުކަޒުތަކަށް އިރުޝާދު ދެއްވާފައެވެ. އެގޮތުން، އެފަދަ ޕްރޮގްރާމްތައް ފަރުމާކުރުމަށްފަހު އެމްކިއުއޭއަށް ހުށަހެޅުމަށް އަންގަވާފައިވެއެވެ. އަދި އެއްވެސް ޕްރޮގްރާމެއް އެމްކިއުއޭގެ ހުއްދަ ނުހޯދައި ކުރިއަށް ނުގެންދިއުމަށްވެސް އެމްކިއުއޭއިން ވިދާޅުވެފައިވެއެވެ.
