ބިދޭސީންގެ ބަޔަކު ހުޅުމާލޭ ގަރާޖެއްގެ މަތީގައި ހިންގަމުން ދިޔަ ކާބޯތަކެތި ޑެލިވަރީ ކުރާ ތަނެއް މޯލްޑިވްސް އިމިގްރޭޝަނުން ބަލާފާސްކޮށް ހުއްޓުވައިފިއެވެ.
އިމިގްރޭޝަނުން ވިދާޅުވީ އެތަން ހުއްޓުވީ އިއްޔެ އިފްތިތާހު ކުރި "އިމިގްރޭޝަން ވޮޗް" އަށް ލިބުނު މައުލޫމާތަކާއި ގުޅިގެން ކަމަށެވެ. އިމިގްރޭޝަންގެ އޮފިޝަލުން އެ ތަނަށް ހާޒިރުވިއިރު ބިދޭސީން ދިޔައީ އެތަން ރޫޅާލާ ހުސްކުރުމުގެ މަސައްކަތް ކުރަމުން ކަމަށް އިމިގެރޭޝަނުން ވިދާޅުވިއެވެ.
އިމިގްރޭޝަނުން އިތުރަށް ވިދާޅުވީ ކާބޯތަކެތި ޑެލިވަރީ ކުރާ ތަނުގައި ތިބި ބިދޭސީ އަށް މީހަކާއި ގަރާޖުން ތިން މީހަކު އެއިދާރާގެ ބެލުމުގެ ދަށަށް ގެންގޮސްފައިވާކަމަށެވެ.
މީގެ އިތުރުން، މިތަނާއި ގުޅޭގޮތުން ދާދި ފަހުން ސޯޝަލް މީޑިއާގައި އާއްމުން ކަންބޮޑުވުން ފާޅުކޮށްފައިވާކަން ވެސް އިމިގްރޭޝަނުން ވިދާޅުވިއެވެ. އެ އިދާރާއިން އާންމުކުރި ފޮޓޯތަކުގައި ފެންނަނީ ވަރަށް މުޑުދާރުކޮށް ހުރި ތަނެކެވެ.
ގަވާއިދާ ހިލާފަށް އުޅޭ ބިދޭސީން ހުއްޓުވަން އިމިގްރޭޝަނުން ވަނީ ފުލުހުންނާއި ގުޅިގެން ބޮޑު މަސައްކަތެއް ފަށާފައެވެ. އަދި މިގޮތުން އަތުލައިގަނެވޭ ބިދޭސީން އަންނަނީ ޑިޕޯޓުކުރަމުންނެވެ،
