ބާސެލޯނާ ދޫކޮށްލަން ތަޖުރިބާކާރު މިޑްފީލްޑަރު ސާޖީ ރޮބާޓޯ ނިންމައިފިއެވެ.
އިތުބާރުހިފޭ ޖާނަލިސްޓް ފަބްރީޒިއޯ ރޮމާނޯ ވަނީ ސާޖީ ރޮބާޓޯ ބާސާ ދޫކޮށްލި ކަން ޔަގީން ކޮށްދީފައެވެ. ފަބްރީޒިއޯ ހާމަކުރި ގޮތުގައި, ރޮބާޓޯ ބާސާއާއެކު ހަދާފައިވާ ކޮންޓްރެކްޓް މި ޖޫން މަހަށް ހަމަވި އިރު, ބާސާއިން ވަނީ އޭނާގެ އާ ކޮންޓްރެކްޓް އާ ނުކުރަން ނިންމާފައެވެ.
ރޮބާޓޯ, ބާސާ ދޫކޮށްލިކަން ހާމަކުރަމުން ފަބްރޯޒިއޯ ސޯޝަލް މީޑިއާގައި އާއްމު ކުރި ޕޯސްޓުގައި އޭނާ ހާމަކުރި ގޮތުގައި ރޮބާޓޯ ބާސާގައި މަޑުނުކުރާނެ ކަން މިހާރު އިއުލާނުކުރި ކަމުގައިވިއަސް, ޖޫން މަހުން ފެށިގެން ބާސާއިން ވަނީ ރޮބާޓޯގެ ކޮންޓްރެކްޓް އާ ނުކުރަން ނިންމާފައި ކަމަށެވެ.
ސާޖީ ރޮބާޓޯއަކީ ބާސެލޯނާގެ ޔޫތު އެކަޑަމީއިން އެ ކްލަބުގެ ސީނިއާ ޓީމާ ގުޅުނު ކުޅުންތެރިޔެކެވެ. އޭނާ އެންމެ ފުރަތަމަ ބާސާގެ އެކަޑަމީއާ ގުޅުނީ 2006 ވަނަ އަހަރުގައެވެ. 2009 ވަނަ އަހަރު އޭނާ ވަނީ ބާސާގެ ބީ ޓީމަށް ކުޅެން ފަށާފައެވެ. ރޮބާޓޯ އެންމެ ފުރަތަމަ ބާސާގެ ސީނިއާ ޓީމާ ގުޅުނީ 2010 ވަނަ އަހަރުގައެވެ.
ރޮބާޓޯ, ބާސާގެ ސީނިއާ ޓީމުގައި ހޭދަ ކުރި 14 އަހަރުގައި އޭނާ ވަނީ އެ ކްލަބަށް 245 މެޗު ކުޅެދީ 12 ލަނޑު ކާމިޔާބު ކޮށްފައެވެ. ރޮބާޓޯ, ބާސާއަށް ކާމިޔާބު ކޮށްދިން 12 ލަނޑުގެ ތެރެއިން އެންމެ ފާހަގަކޮށްލެވޭ ލަނޑަކީ 2017 ވަނަ އަހަރު ޗެމްޕިއަންސް ލީގުގެ ރައުންޑް އޮފް 16 ގައި ޕީއެސްޖީ ކޮޅަށް ފަހު ވަގުތު ޖެހި ލަނޑެވެ.
