ފޯނާއި ޓެބްލެޓު ފަދަ މުވާސަލާތީ ވަސީލަތްތަކަކީ މި ޒަމާނުގައި އަހަރުމެންގެ ދިރިއުޅުމަށް ވަރަށް މުހިއްމު އެއްޗެކެވެ. މިއަދު ގައިގަނޑަކަށް އެންމެން އަތުގައި ސްމާޓް ފޯނެއް އޮންނާނެއެވެ. ސްކޫލު ޓީޗަރުންނާއި ބެލެނިވެރިންނާއި ދެމެދު ވެސް މިއަދު މުއާމަލާތްކޮށް ހަދަނީ ވައިބާ ފަދަ އެޕްލިކޭޝަންތަށް ބޭނުން ކޮށްގެނެއެވެ. ނަމަވެސް މިއަދު އަހަރެމެންގެ މުޖުތަމައުގައި ބޮޑެތި މީހުންގެ އިތުރުން ވަރަށް ގިނަ ކުޑަކުދިން ވެސް މިފަަދަ މުއާސަލާތީ ވަސީލަތްތަށް ބޭނުން ކުރަމުންދާ މަންޒަރު އެބަފެނެއެވެ. މިއީ ރަނގަޅު ކަމެއްބާއެވެ.
ކުޑަކުދިންނަށް ފޯނެއް ނުވަތަ ޓެބްލެޓެއް ދިނުމަކީ އެކުދިންނަށް ކިޔަވައި ދިނުމަށް ވަރަށް ފަސޭހަ ވެގެންދާ ކަމެކެވެ. މިފަދަ ވަސީލަތްތަށް ބޭނުންކޮށްގެން ކުޑަކުދިން ވަރަށް ތުއްތު އުމުރުން ފެށިގެން ވަރަށް ގިނަ ކަންކަން ދަސްކުރެއެވެ. މިފަދަ ވަސީލަތްތަކުގެ އެހީގެ އިނގިރޭސި ބަހާއި ދިވެހި ބަހުގެ އިތުރުން އެހެން ބަސްތަކުން ވާހަކަ ދައްކަން ދަސްކުރާ ކުދިން ވެސް މަދެއް ނޫނެވެ. ހަމައެހެންމެ، މިފަދަ ޓެކްނޮލޮޖީގެ ވަސީލަތްތަކުގެ އެހީގައި ކުޑަކުދިން ދަނީ އެކިކަހަލަ ހުނަރުތައް ދަސްކުރަމުންނެވެ. މިގޮތުން، މޮޅަށް ކުރަހަން ދަސްކުރާކުދިންނާއި ގްރެފިކް ޑިސައިނިންގް ފަދަ ހުނަރުތަކަކީ މިއަދު ގިނަ ކުދިންގެ ކިބައިގައި އަށަގަނެވިފައިވާ ކަންކަމެެވެ. އެހެންކަމުން މިފަދަ ވަސީލަތްތަކުގެ ސަބަބުން ކުޑަކުދިންނަށް ގިނަ ފައިދާ ތަކެއް ލިބިގެންދާކަމީ ޔަގީންކަމެކެވެ.
މިފަދަ ވަސީލަތްތަކުން ކުދިންނަށް ގިނަ ފައިދާތަކެއް ލިބިގެންދާއިރު، މިއިން އެކުދިންނަށް ކުރާ ގެއްލުން މާބޮޑެވެ. މިގޮތުން މިފަދަ ވަސީލަތްތަކަކީ ކުދިން އިސްލާމް ދީނާއި ދުރުކުރުވާ އެއްޗެކެވެ. މިފަދަ ވަސީލަތްތަކުގެ ސަބަބުން ކުޑަކުދިންގެ ތުއްތު އުމުރުގައި އެކުދިންގެ ހިތުގައި އިސްލާމް ދީނަށް ދެވޭ އަހަމިއްޔަތުކަން ވަނީ ގެއްލިފައެވެ. އަދި އެކުދިން ދީނަށް ވުރެ ދުނިޔޭގެ ކުދިކުދި އުފާތައް އިސްކުރާތަން އެބަފެނެއެވެ. ހަމައެހެންމެ މިފަދަ ވަސީލަތްތަކުގެ ސަބަބުން އެކުދިންނަށް އެ އެމުރުގައި ލިބެންޖެހޭ ވަރަށްވުރެ ބޮޑަށް ޕްރައިވެސީ ދެވެއެވެ. މީގެސަބަބުން މިއަދު ގިނަ ކުދިންނަކީ އިންޓަރނެޓް ބޭނުންކޮށްގެން ބަރަހަނާ މަންޒަރުތަށް ބެލުމަށް ދެވިހިފާފައިވާ ބައެކެވެ. ހަމައެހެންމެ، ރޭގަނޑު ނުނިދާ ތިބުމަކީ ވެސް މިއަދު ގިނަ ކުދިންގެ އާދައެކެވެ. މައިންބަފައިންނާއި، އާއިލާއާ ދެމެދު އޮތް ގުޅުމަށް ވުރެ ބޮޑަށް މިއަދު ގިނަ ކުދިންނަށް އިސްކަމެއް ދެވެނީ އެކުދިންގެ ފޯނާއި ޓެބްލެޓަށެވެ. ވީމާ، ޓެބްލެޓް އަދި ފޯނު ފަދަ ވަސީލަތްތައް ކުޑަކުދިންނަށް ދިނުމަކީ އޭގެ ސަބަބުން ވަރަށް ނުރައްކާތެރި ގެއްލުންތަކެއް އެކުދިންނަށް ލިބިދާނެކަމެކެވެ.
އެހެންވީމާ މިކަމުގެ ހައްލަކީ ކުޑަކުދިންނަށް އެއްވެސް ކަހަލަ ޒަމާނީ ވަސީލަތެއް ނުދީ ބެހެއްޓުން ތޯއެވެ؟ ނޫނެކެވެ. ކުޑަކުދިންނަށް ފޯނާއި ޓެބްލެޓެއްގެ ބަދަލުގައި ކޮމްޕިއުޓަރެއް ދިނުމަކީ ކުރެވިދާނެ ކަމެކެވެ. މީގެ ސަބަބުން ކުޑަކުދިންނަށް ފޯނެއް ނުވަތަ ޓެބްލެޓަކުން ލިބޭ ޕްރައިވެސީއެއް ނުލިބޭނެއެވެ. އަދި ކޮމްޕިއުޓަރ ގޭގައި އެންމެންނަށް ފެންނަ ކަހަލަ ތަނެއްގައި ބަހެއްޓެމުން ރޭގަނޑު ނުނިދާ ކުޅެން އޮތުމަކީ އުދަނގޫ ކަމަކަށް ވާނެއެވެ. އަދި އެކުދިންނަށް މިފަދަ ވަސީލަތެއް ދޭޭއިރު، އޭގެން ކުރާ ހުރިހާ ކަަމެއް ބެލެނިވެރިންނަށް ފެންނަ ގޮތަށް ބެހެއްޓުމަކީ މުހިއްމު ކަމެކެވެ. މީގެއިތުރުން، އެކުދިންނަށް ކޮންމެ ދުވަހަކު ބޭނުން ވަރަކަށް ކުލޭން ދިނުމުގެ ބަދަލުގައި، ހަފްތާއަކު ތިން ދުވަހަށް ވުރެ ގިނައިން އެ ކުދިންނަށް ކުޅެން ނުދޭށެވެ. މިހެން ހެދުމުން ފޯނަކާއި ޓެބްލެޓެއްގެ ސަބަބުން އެކުދިންނަށް ލިބޭ ފައިދާތަށް ލިބި، އަދި އޭގެއިންވާ ގެއްލުންތަށް ވަރަށް ބޮޑަށް މަދު ކޮށްލެވޭނެއެވެ.
