މާލޭ ރޯ މަސް މާރުކޭޓަކީ މުޅި މާލޭގައި އެންމެ ގިނަބަޔަކު ޚިދުމަތް ހޯދާ އެއްތަނަށްވާނެކަން ޔަގީނެވެ. ކޮންމެ ދުވަހަކު އެތައްބަޔަކު މަސް މާރުކޭޓުން މަހުގެ އެކި ބާވަތްތައް ގަނެއެވެ. އެކަމަކުު މިތަނުގައި ވިއްކާ މަހުގެ ބާވަތްތަކުގެ ސާފު ތާހިރުކަމާމެދު މިއީ އަބަަދުވެސް ދިވެހިންގެ ތެރޭގައި ބަހުސް ކުރެވޭ މައުޟޫއެކެވެ.

ފަޅު ތެރޭގެ މުޑުދާރުކަން، ބޮޑު ކަންބޮޑުވުމެއް!

މަސް މާރުކޭޓް ހިމެނޭ ސަރަހައްދުގެ ފަޅު ތެރޭގެ މުޑުދާރުކަމުގެ ވާހަކަ ދައްކާލަން ޖެހެނީ އެތައް ބައިވަރު ސަބަބުތަކާ ހުރެއެވެ. އެއްކޮޅަކުން ފަށަމާ ހިނގާށެވެ.

މާލޭ މަސް މާރުކޭޓުގައި މަސް މާރުކޭޓުގައި މައިގަނޑު ގޮތެއްގައި މަސްވިކަން ތިބެނީ ގަނެވިއްކާ މީހުންނެވެ. މަސްމާރުކޭޓުގެ ގިނަ ސްލޮޓް (ގޮޅި) ތައް އޮޕަރޭޓް ކުރަނީ މިދެންނެވި މީހުންނެވެ. މިފަރާތްތަކުން ދޯނިތަކުން މަސްގަނެ މަސް ރައްކާ ކުރަނީ އައިސް ފޮށި ތަކުގައެވެ. މަސް މާރުކޭޓަށް މަސް ވިއްކަން ވައްދަނީ މިދެންނެވި އައިސް ފޮށިތަކުން ނެރެގެންނެވެ.

މަސް އަޅައި ރައްކާ ކޮށްފައި ހުންނަ އައިސް ފޮށިތައް ބަހައްޓާފައި ހުންނަ ސަރަހައްދު. ފޮޓޯ: ހަލިނިއުސް

ބައެއް އައިސް ފޮށިތައް ބަހައްޓާފައި ހުންނަނީ ލޯކަލް މާރުކޭޓާއި އިންވެގެން، ކަނޑުތޮއްޓާ ދިމާވީ ފަރާތަށެވެ. މާރުކޭޓުގައި މަސްވިއްކާ ބައެއް ގްރޫޕްތަކުން އެ ގްރޫޕްތަކުގެ ބައެއް އައިސް ފޮށިތައް އެސަހައްދުގެ ފަޅުގައި އެކަމަށް އަޅާފައި ހުރި ދޯނިތަކުގައިވެސް ބަހައްޓައިގެން އޮޕަރޭޓް ކުރަމުން ގެންދެއެވެ.

ކަންބޮޑުވުމަކީ، މި އައިސް ފޮށިތަކުގައި މަސް ރައްކާ ކުރެވޭ ގޮތް ބަލަނީ ކޮން އިދާރާއަކުންތޯއެވެ؟ މަދު އައިސްކޮޅެއް ފޮއްޓަށް އެޅުމަށްފަހު، އައިސް ފޮށީގެ ފިނިކަން ހިފެހެއްޓުމަށް، އައިސްގެ ބަދަލުގައި ފަޅު ތެރެއިން ލޮނުފެން އަޅައިގެން އައިސް ފޮށިތައް އޮޕަރޭޓް ކުރޭތޯ ބެލޭނެ ނިޒާމެއް ނެތެވެ.

މަސް މާރުކޭޓް ސަރަހައްދުގެ ފަޅުތެރެ. ނަޖިހާއި އާންމު ކުނިބުނި ގިނަ ސަރަަހައްދެއް. ފޮޓޯ: ހަލިނިއުސް

އައިސް ފޮށިތަކަށް އެސަރަހައްދުގެ މޫދުން ލޮނުފެން އަޅައިގެން އައިސް ފޮށިތައް އޮޕަރޭޓް ކުރޭތޯ ބެލުމަކީ ކަމާ ބެހޭ އިދާރާތަކުން ކޮންމެހެން ކުރަންޖެހޭ ކަމެއް ކަމުގައި ދެކެމެވެ. ސަބަބަކީ، މިސަރަހައްދުގެ ފަޅު ބޭނުން ކުރާ އޮޑި ދޯނިފަހަރުގެ ފަޅުވެރިން ބޮޑުކަމު އަދި ކުޑަކަމު ދިޔަކަމުގައިވިޔަސް މިތަކެތީގެ ފަހު މަންޒިލަކީ މިލޮނުގަނޑު ކަމުގައިވާތީއެވެ. މިދެންނެވުނީ ތެދެއްކަން ތިރިހީކަށް މިނެޓް މިސަރަހްދުގައި މަޑުކޮށްލިނަމަވެސް އަމިއްލައަށް ތަޖުރިބާ ކޮށްލެވޭނެއެވެ.

ކޮންމެ ނިޔަތެއްގައި ނަމަވެސް އައިސް ފޮށިތަކަށް މިފަޅުން ފެންއަޅައިފިނަމަ، ކިހާ ދުވަހަކަށް މިފޮށިތަކުގައި ނަޖިސް ހަރުލާފައި ހުންނާނެކަން ތަސައްވުރު ކޮށްލައްވާށެވެ. މާލޭ މަސްމާރުކޭޓުގެ ސާފުތާހިރުކަމާ ގުޅޭ އެއްވެސް ސަރވޭއެއް ކަމާ ގުޅޭ އެއްވެސް އިދާރާއަކުން ފަހުގެ ތާރިހެއްގައި ކުރިކަން އެނގޭކަން ނެތެވެ.

މަސް މާރުކޭޓް ސަރަހައްދުގެ ފަޅުތެރެ. ނަޖިހާއި އާންމު ކުނިބުނި ގިނަ ސަރަަހައްދެއް. ފޮޓޯ: ހަލިނިއުސް

މަސްކަނޑާ އަށިތަކަށް ވިސްނާލައިފިނަމަ ފެންނާނީ ހުރިހާ ފެން އިސްކުރުތަކެއް ދޫކޮށްލާފައިވާ މަންޒަރެވެ. ކަނޑަކަޑައި ހުރި މަހުގެ މައްޗަށް އެޅެމުން އެދަނީ ލޮނު ފެނެއެވެ. ލޮނުފެން ނެގިފައި ވަނީ ކަނޑުތޮއްޓާ ދިމާ ބޭރުންނެވެ. އެކަމަކު މިސަރަހައްދަކީ ނަޖިހުގެ އަސަރު ހުރެދާނެ ސަރަހައްދެއްތޯ މިއަދު މިވަނީ ޔަގީން ކުރަން ޖެހިފައެވެ.

ފާއިތުވެދިޔަ ހަފްތާއަކީ މުޑުދާރު ކާބޯތަކެތީގެ ޚަބަރުތަކުން މުޅި ގައުމު ހުއްޓުން އަރުވާލި ހަފްތާއެކެވެ. ކާބޯތަކެތި ވިއްކާ ތަންތަނުގެ ސާފުތާހިރުކަމާމެދު އުފެދިފައިވާ ސުވާލުތަކަކީ އަޅައި ނުލައި ދޫކޮށްލެވޭ ވަރަށްވަރު މާ ސީރިއަސް މައްސަލަތެކެވެ. ހަރުކަށި ފިޔަވަޅުތަކެއް އަޅައިގެންނަމަވެސް ކާބޯތަކެތި ވިއްކާ ތަންތަނާއި ޚިދުމަތްދޭ ތަންތަނުގެ ސާފުތާހިރުކަން ރައްޔިތުންނަށް ކަށަވަރު ކޮށްދޭން ޖެހެއެވެ.

އިތުރު ލިޔުންތައް