އިލެކްޓްރިކް ވެހިކަލް (އީވީ) ކާރު އަދި ސައިކަލް ޗާޖިންގ ސްޓޭޝަންތައް ތަޢާރަފުކުރަން ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އިން ނިންމައިފިއެވެ.
މި މަޝްރޫޢަކީ ރާއްޖެ ސާފު ހަކަތައިގެ މުސްތަޤުބަލަކަށް ގެންދިއުމަށް މަސައްކަތްކުރައްވާ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވިސްނުންފުޅާ އެއްގޮތަށް ކުރިއަށްގެންދާ މަޝްރޫޢެކެވެ.
ސްޓެލްކޯއިން ވިދާޅުވި ގޮތުގައި، ރައީސް މުޢިއްޒުގެ ތިމާވެށި ރައްކާތެރިކުރުމުގެ ހަރުދަނާ ސިޔާސަތުތަކާ އެއްގޮތްވާ ގޮތުގެ މަތިން، ކާބަން ބޭރުކުރާ މިންވަރު މަދުކުރުމަށް މަސައްކަތްތައް ދަނީ ކުރަމުންނެވެ. މީގެ އިތުރުން، ޤައުމީ އަދި ބައިނަލްއަޤްވާމީ ފެންވަރުގައި ތިމާވެއްޓާ ރައްޓެހި އުޅަނދުފަހަރަށް އޮންނަ ޑިމާންޑް އިތުރުވަމުން ދިއުމާ ގުޅިގެން، އެފަދަ އުޅަނދުތައް ބޭނުންކުރާ ފަރާތްތަކަށް އިތުރު ލުއިފަސޭހަތަކެއް ފޯރުކޮށްދިނުމަށް ވަނީ ނިންމާފައެވެ.
މި ގޮތުން، އިލެކްޓްރިކް އުޅަނދުފަހަރު ބޭނުންކުރުމަށް ހިތްވަރު ދިނުމުގެ ގޮތުން، ސްޓެލްކޯގެ ހެޑް އޮފީހާ ޖެހިގެން އޮންނަ ދޮންއަދަރާދަ މަގުގައި އިލެކްޓްރިކް ވެހިކަލް ޗާޖިންގ ސްޓޭޝަނެއް ޤާއިމްކުރެވިގެންދާނެކަމަށް ސްޓެލްކޯއިން ވިދާޅުވިއެވެ.
އަދި މި ކަމުގައި ސިޓީކައުންސިލާއި މަޝްވަރާކުރެވި، ކައުންސިލްގެ ފުރިހަމަ އެއްބާރުލުން ލިބިގެންދާނެ ކަމުގެ ޔަޤީންކަން ލިބިފައިވާކަމަށްވެސް ސްޓެލްކޯއިން ވިދާޅުވިއެވެ.
މީގެ އިތުރުން، ސްޓެލްކޯއިން ވިދާޅުވީ، ދުނިޔޭގައި ކޮންމެ ކާރަކަށް އެންމެ ގިނަ ޕަބްލިކް ޗާޖިންގ ސްޓޭޝަން ހުރި ޤައުމު ކަމުގައިވާ ދެކުނު ކޮރެއާގެ ކާމިޔާބީ ނަމޫނާއެއް ގޮތުގައި ބަލައިގެން، ސްޓެލްކޯއިން އެފަދަ އިންފްރާސްޓްރަކްޗަރެއް ޤާއިމުކުރުމަށް އަމާޒުކުރާކަމަށެވެ.
މިގޮތުން، ކޮންމެ ތިން ކާރަކަށް އެއް ޗާޖިންގ ސްޓޭޝަން ބެހެއްޓުމަށް ސްޓެލްކޯއިން ރާވައިފައިވެއެވެ. އެހެންކަމުން، ރާއްޖެ އިލެކްޓްރިކް އުޅަނދުތަކަށް ބަދަލުވުމުގެ މަރުޙަލާ ފަސޭހަ ގޮތެއްގައި ކުރިއަށް ގެންދެވޭނެކަމަށް އެކުންފުނިން ވިދާޅުވިއެވެ.
