2019 ވަނަ އަހަރު ދުނިޔޭގެ ސަމާލުކަން ހޯދި 'ހަވަލްޑިމިރް' ނަމަކަށް ކިޔާ ބެލޫގަ ވޭލްއެއް (ބޮޑު ކޯމަހުގެ ބާވަތެއް) ނޯވޭގައި މަރުވެފައި އޮށްވާ ފެނުނު ކަމަށް ރިޕޯޓުކޮށްފިއެވެ.
14 ފޫޓު ދިގު އަދި 1200 ކިލޮގުރާމު ބަރުދަނުގެ މި ބެލޫގަ ވޭލް މީގެ 5 އަހަރު ކުރިން ކެމެރާއެއް ހަރުކުރުމަށް ފަރުމާކޮށްފައިވާކަމަށް ހީވާ ހާނެހެއް އަޅުވައިގެން އެޅޭ ތަނުގެ މަންޒަރު ވައިރަލްވިއެވެ. މިކަމާ ގުޅިގެން އިންޓަނެޓުގައި މި ބެލޫގާއަށް ކިޔަން ފެށީ ހްވަލްޑިމިރް ދަ ސްޕައި ވޭލް (ޖާސޫސީ ވޭލް) އެވެ.
މި ހާނެހުގައި ސެއިންޓް ޕީޓަރސްބާގުގެ "އިކުއިޕްމަންޓް" ލިޔެފައި އޮތުމުން، މި ބެލޫގާއަކީ ރަޝިއާގެ ރިކޮނަސެންސް މިޝަނެއްގެ ބައެއް ކަމަށް ލަފާކުރެވުނެވެ. ރަޝިއާއިން މި ބެލޫގާއަކީ އެ ޤައުމުގެ އެއްޗެއް ކަމަށް ރަސްމީކޮށް ބުނެފައި ނުވާތީ، މިއީ ޖާސޫސެއްތޯ ނުވަތަ ހަމަ އާދަޔާ ޚިލާފު ހާލަތެއްގައި ޖެހުނު ބެލޫގާއެއްތޯ ދުނިޔެ ސުވާލު ކުރަން ފެށިއެވެ.
މި ބެލޫގާގެ ނަމަކީ ނޯވޭ ބަހުން ބޮޑު މަހަށް ކިޔާ "ހްވަލް" އާއި ރަޝިއާގެ ނަމެއް ކަމަށްވާ ވްލަޑިމިރް އެއްކޮށްލައިގެން ހަދާފައިވާ ނަމެކެވެ. އާންމުކޮށް ބެލޫގާ ވޭލް ދިރިއުޅެނީ އާކްޓިކްގެ ފިނި ކަނޑުގައި އިންސާނުންނާ ދުރުގައި ނަމަވެސް، ހްވަލްޑިމިރް އިންސާނުންނާ ކައިރިވުމަށް ފަސްޖެހުމެއް ނެތެވެ. އެހެންކަމުން މާހިރުން ދެކޭގޮތުގައި މި ބެލޫގާ އޭގެ ދިރިއުޅުމުގެ ބޮޑު ބައެއް ހޭދަކޮށްފައިވަނީ ބަންދުގައި، އިންސާނުންނާ އެކުގައިއެވެ.
"މިއީ ވަރަށް ހިތާމަވެރި ކަމެއް. އޭނާ ހަމައެކަނި ނޯވޭގައި ވެސް ހާސްތަކެއް މީހުންގެ ހިތްތަކަށް ވަނީ ވަދެފައި،" ހްވަލްދިމިރް ރައްކާތެރިކުރުމަށް މަސައްކަތްކުރި ނޮން-ޕްރޮފިޓް ޖަމްޢިއްޔާ 'މެރިން މައިންޑް' ގެ ބާނީ ސެބަސްޓިއަން ސްޓްރޭންޑް ބުނެފައިވެއެވެ. ފާއިތުވި އަހަރު، ނޯވޭއިން އެ ޤައުމުގެ ރައްޔިތުންނަށް އެދިފައިވަނީ އޮސްލޯއާ ކައިރިން ފެނިފައިވާ ހްވަލްދިމިރާ އެއްވެސް ބާވަތެއްގެ ގުޅުމެއް ނުބޭއްވުމަށެވެ.
