ރަތްމަހަކީ އާންމުކޮށް ރޭގަޑު ނަނު ފައްތައިގެން ކުރާ މަސްވެރިކަމުގައި އެންމެ ގިނަ ޢަދަދަކަށް ބޭނޭ ބާވަތެކެވެ.
ދިވެހިންގެ ކެއުމުގައި ތަފާތު ގޮތްގޮތަށް ތައްޔާރު ކުރާ މީރުމަހެކެވެ. ރަތްމަސް ޢާންމުގޮތެއްގައި އުޅެނީ ތިލަ ފަރުފަރުގެ ބޭރުގައެވެ. ނަމަވެސް ވަރަށް މަދުން 70 މީޓަރު ފުނުންވެސް މިމަސް ބޭނެއެވެ. ޚާއްޞަކޮށް ފޮއި މަތީގައި ކަނޑަވަޅީތެރެއިން މިމަހަކީ ގިނައިން ބާނާ މަހެކެވެ.
މިއީ ފަލަ ހަށިގަނޑެއްލިބިފައިވާ މަހެކެވެ. މިމަސް އެންމެ ބޮޑުވަނީ 75 ސެންޓްމީޓަރަށެވެ. މަހުގެ ޢާންމު ކާނާއަކީ ކުދިމަހާއި، ކަކުނިފާޑުގެ ސޫތްޕާއި ބޯވަދިލަމަހެވެ.
މަހުގެ ބުރަކަށިމަތީ ކޮތަރީގައި 10 ހަރުކަށްޓާއެކު 13 ނުވަތަ 14 މަޑުކަށިހުރެއެވެ. ބަނޑުދަށްފަރާތު ކޮތަރީގައި3 ހަރުކަށްޓާއެކު 8 މަޑުކަށިހުރެއެވެ. ކަންފަތްގަނޑޫގައި 16 ނުވަތަ 17 މަޑުކަށިހުރެއެވެ. ރަތްމަހުގެ ކުލައަކީ ރަތްކުލައެވެ. މިރަތްކުލަ މަހުގެ ބުރަކަށިމަތީގައި ގަދަވެގެންގޮސް ހުންނަނީ ކަޅުރަތްކުލައަކަށް ބަދަލުވެފައެވެ. ޅަމަހުގައްޔާއި އަދި ބައެއް ބޮޑެތިމަހުގެ ދެއަރިމަތީގައި، ރިހުކުލައިގެ ދެ ލައްހުރެއެވެ. މިފާހަގަ ބޮޑަށް ފާޅުކޮށް ފެންނަނީ މަސް އޭގެ އަމިއްލަ މާޙައުލުގައި އުޅޭއިރުއެވެ. މަހުގައި ހުންނަ ހުޅުނބުގެ މެދުހުންނަނީ ރިހިކުލައެއްގައެވެ.
މަސްދަރު: ފިޝަސް އޮފް ދަ މޯލްޑިވްސް، މޯލްޑިވްސް މެރިން ރިސާޗް ސެންޓަރ، 2003
