ޒަޔަނިސްޓް އިޒްރޭލު އިންޓަލެޖެންސުން އިއްޔެ ހަވީރުގެ ވަގުތެއްގައި ލުބްނާނަށް ދިން ސައިބަރ ހަމަލާގައި އެގައުމުގައި ހުންނަވާ އިރާން ސަފީރުގެ އެއްލޯފުޅު ގެއްލިފައިވާކަން ނިއުޔޯކް ޓައިމްސްއިން ބުނެފިއެވެ.
ހިޒްބުﷲ ޖަމާއަތުގެ މުޖާހިދުން މުއާސަލާތު ކުރަން ގެންގުޅޭ "ޕޭޖަރ" ތަކަށް އަމާޒުކޮށް އިޒްރޭލުން ދިން މި ހަމަލާގައި އިރާނުގެ ސަފީރު މޮޖްތަބާ އަމީނީއަށް ލިބިފައިވާ ޒަޚަމްތައް ސީރިއަސްކަމުން އަމިނީ ތެހެރާނަށް ގެނައުމުގެ މަސައްކަތް މިހާރު ދަނީ ކުރަމުންނެވެ.
ސަފީރު މޮޖްތަބާ އަމީނީގެ ބޮޑީ ގާޑަކާ ހަވާލާދީ ނިއުޔޯކް ޓައިމްސްއިން ބުނެފައި ވަނީ ޕޭޖާ ގޮވީ 10 ވަރަކަށް ސިކުންތު ވަންދެން ބީޕް ވުމަށްފަހު ކަމަށެވެ. "ބީޕްވާން ފެށީމަ ސަފީރު މެސެޖްތަކެއް އަންނަނީކަމަށް ހީފުޅު ކުރައްވައި ސަފީރު މަސައްކަތް ކުރެއްވީ މެސެޖް ބެއްލެވުމަށް. އެގަވުތު ޕޭޖަރ ގޮވީ" ނިއު ޔޯކް ޓައިމްސްއަށް މައުލޫމާތު ދިން ބޮޑީ ގާޑް ބުނެފައިވެއެވެ.
ޕޭޖާތައް ގޮއްވާލައިގެން ދިން މި ހަމަލާގެ ސަބަބުން 9 މީހުން ޝަހީދުވެ، 2،750 މީހުން ވަނީ ޒަޚަމްވެފައެވެ. މީގެ ތެރެއިން 200 މީހުންގެ ހާލު ސީރިއަސްކަމަށް ލުބްނާނުގެ ސިއްޚީ ވުޒާރާއިން ހާމަ ކުރައްވައެވެ.
ހިޒްބުﷲ ޖަމާއަތުގެ މެމްބަރުންނާއި ލުބްނާނާއި ސީރިއާގައި ހަރަކާތްރެރިވާ އިރާނުގެ މަސްއޫލުވެރިން، ސްމާޓް ފޯނުގެ ބަދަލުގައި ގެންގުޅުއްވަނީ ޕޭޖާކަމަށް ރިޕޯޓްތައް ބުނެއެވެ. މަޤްސަދަކީ ސަހްޔޫނީ އިޒްރޭލުގެ އިންޓަލެޖެންސް "މޮސާޑް" އިން ދީފާނެ ހަމަލާއަކުން ރައްކާތެރި ވުމެވެ.
ފަހުގެ މައުލޫމާތު ތަކަށް ބަލާއިރު، އިއްޔެ ލުބްނާނާއި ސީރިޔާ ތެރޭގައި އިޒްރޭލުން ގޮއްވާލި ޕޭޖަރުތައް އުފެއްދީ ތައިވާނަށް ނިސްބަތްވާ ކުންފުންޏަކުންނެވެ. މީޑިޔާ ބައެއް ރިޕޯޓްތައް ބުނާ ގޮތުގައި ހިޒްބުﷲއިން ލުބްނާނަށް އެތެރެކުރި 5000 އެއްހައި ޕޭޖަރުގައި އިޒްރޭލުގެ އިންޓަލެޖެންސުން ވަނީ ގޮވާ ޒާތުގެ ތަކެތި ހަރުކޮށްފައެވެ.
