އީރާނުގެ ދެކުނު ޚުރާސާން ޕްރޮވިންސްގައި ހުރި ކޯލް މައިންނެއްގެ ބައެއް ގޮވުމާގުޅިގެން މަދުވެގެން 51 މީހުން މަރުވެއްޖެކަމަށް އީރާނުގެ ދައުލަތުގެ މީޑިއާއިން ރިޕޯޓުކޮށްފިއެވެ.
މީތޭން ގޭހުގެ ލީކެއްގެ ސަބަބުން ހިނގި މި ހާދިސާ ހިނގާފައިވަނީ ހޮނިހިރު ދުވަހުގެ ރޭގަނޑު ޓަބާސްގައި ހުންނަ މަދަންޖޫ މައިންގައެވެ. މިތަނަކީ ޓެހެރާނުން ގާތްގަނޑަކަށް 540 ކިލޯމީޓަރު ދެކުނު އިރުމަތީގައި އޮންނަ ތަނެކެވެ.
ހާދިސާ ހިނގިއިރު ދެ ސަރަޙައްދެއްގައި 69 މަސައްކަތްތެރިން ތިބިއެވެ. އޭގެތެރެއިން 47 މީހުން ތިބީ ބީ ބްލޮކްގައެވެ. އަދި 22 މީހުން ތިބީ ސީ ބްލޮކްގައެވެ.
މީހުން ސަލާމަތްކުރުމުގެ މަސައްކަތް ކުރަމުންދާއިރު، މަދުވެގެން 20 މަސައްކަތްތެރިންނަށް އަނިޔާވެފައިވާއިރު އެހެން ބައެއް މީހުން މައިންގެ ތެރޭގައި ތާށިވެފައި ތިބުމުގެ ފުރުސަތު އެބައޮތެވެ. މައިންގެ ތެރޭގައި ގޭސް އެއްވެފައި ހުރުމުގެ ސަބަބުން މީހިން ހޯދުމުގެ މަސައްކަތަށް ދަތިތަކާ ކުރިމަތިވެފައިވާކަމަށް ކަމާ ބެހޭ ފަރާތްތަކުން ބުނެފައިވެއެވެ.
މައިންގެ ތެރޭގައި ދިރިހުރި އަދި ތާށިވެފައިވާ މީހުންގެ އަދަދު އަދިވެސް ސާފެއް ނުވެއެވެ. އީރާނުގެ ރެޑް ކްރެސެންޓުގެ އިސްވެރިޔާ ޙަވާލާދީ، ދައުލަތުގެ ޓީވީން ބުނެފައިވަނީ 24 މީހުން ގެއްލިފައިވާ ކަމަށެވެ.
އީރާނުގެ ރައީސް މަސްއޫދު ޕެޒެޝްކިއާން މި ހާދިސާއާ ގުޅިގެން ހިތާމަ ފާޅުކުރައްވައި، ގެއްލުން ލިބުނު ޢާއިލާތަކަށް ސަރުކާރުން އެހީތެރިވެދޭނެކަމުގެ ޔަގީންކަން ދެއްވާފައިވެއެވެ. ސައުތު ޚުރާސާންގެ ގަވަރުނަރާއި ސަލާމަތްކުރާ ޓީމުތަކުން މިހާރު ފޯކަސްކުރަނީ އަނިޔާވެފައިވާ މީހުންނަށް އެހީތެރިވުމަށާއި ހަށިގަނޑުތައް ހީދުމަށެވެ.
މި ހާދިސާއަކީ އީރާނުގައި ތާރީހުގައި ހިނގާފައިވާ މައިންގެ ހާދިސާތަކުގެ ތެރެއިން އެއް ހާދިސާއެވެ. މީގެ ތެރޭގައި 2017 ވަނަ އަހަރު ހިނގި ގޮވުމެއްގައި 43 މަސައްކަތްތެރިން މަރުވި ހާދިސާއެއް ހިމެނެއެވެ. މި ހާދިސާތަކުގެ ސަބަބުން އީރާނުގެ މައިނިންގ ސިނާއަތުގެ ސަލާމަތީ މިންގަނޑުތަކާ މެދު ރައްޔިތުންގެ ކަންބޮޑުވުން ވަނީ އިތުރުވެފައިވެއެވެ.
