ނ. ކުޑަފަރީގައި އިސްރަށްވެހިންނަށް ޚާއްޞަކޮށްގެން ކްލަބު ހަރަކާތްތަކެއް ބޭއްވުމަށް ވަނީ ހަމަޖެހިފައެވެ.
މި ހަރަކާތްތައް ބާއްވަނީ ޔޫ.އެން.އެފް.ޕީ.އޭ އާއި ކުޑަފަރީ ކައުންސިލް ގުޅިގެންނެވެ. ކުޑަފަރީ ކައުންސިލްގެ އިދާރާއިން މަޢުލޫމާތު ދެއްވިގޮތުގައި، މި ހަރަކާތްތައް ކުރިއަށްދާނީ 2024 ސެޕްޓެންބަރު 29 ވާ އާދިއްތަ ދުވަހުން ފެށިގެން 2024 އޮކްޓޫބަރު 03 ވާ ބުރާސްފަތި ދުވަހުގެ ނިޔަލަށެވެ. މި ހަރަކާތްތަކުގައި ބައިވެރިވެވޭނީ 50 އަހަރުން މަތީގެ ފަރާތްތަކަށެވެ.
ސެޝަންތަކުގައި ހިމެނޭ މުހިންމު ބައިތަކުގެ ތެރޭގައި ހަކުރުބަލި އަދި ކޮލެސްޓްރޯލްފަދަ ބަލިތައް ހުންނަ ފަރާތްތަކަށް ކެއުން ތައްޔާރުކުރާނެ ގޮތްތައް ދަސްކޮށްދިނުމާއި، ކަސްރަތު ސެޝަންތައް ހިމެނެއެވެ. މި ހަރަކާތްތަކަކީ އިސްރަށްވެހިންގެ ޞިއްޙަތާއި ދުޅަހެޔޮކަން އިތުރުކުރުމަށް އަމާޒުކޮށްގެން ބާއްވާ ހަރަކާތްތަކެކެވެ. މި ހަރަކާތްތަކަކީ އިސްރަށްވެހިންގެ ދިރިއުޅުމުގެ ފެންވަރު މަތިކޮށް، އެ ފަރާތްތަކަށް ބޭނުންވާ މުހިންމު މަޢުލޫމާތު ފޯރުކޮށްދިނުމަށް ބާއްވާ ޚާއްޞަ ހަރަކާތްތަކެއް ކަމުގައި ބެލެވެއެވެ.
ބައިވެރިވާން ބޭނުންވާ ފަރާތްތަކުން 2024 ސެޕްޓެންބަރު 26 ވާ ބުރާސްފަތި ދުވަހުގެ މެންދުރުފަހު 14:00 ގެ ކުރިން ރަޖިސްޓްރީ ކުރަންޖެހޭނެއެވެ. ރަޖިސްޓްރީ ކުރެވޭނީ އޮންލައިން ލިންކެއް މެދުވެރިކޮށް ނުވަތަ 7763264 ނަންބަރަށް ޓެލެގްރާމްއިން މެސެޖު ކުރައްވައިގެންނެވެ. ރަޖިސްޓްރީ ކުރާއިރު ބައިވެރިވާ ފަރާތުގެ ނަން، އައިޑީ ކާޑު ނަންބަރު އަދި ގުޅޭނެ ފޯނު ނަންބަރު ހިމަނަންވާނެއެވެ.
