ޗައިނާގެ ޔުނިވާސިޓީތަކާއި ހައި ސްކޫލުތަކުގައި ޤައުމީ ދިފާޢީ ތަޢުލީމުގެ ނަމުން އަސްކަރީ ތަމްރީނުގެ ޕްރޮގްރާމްތަކެއް ހިންގުމަށް ޗައިނާގެ ނޭޝަނަލް ޕީޕަލްސް ކޮންގްރެސްއިން ވިސްނަން ފަށައިފިއެވެ. މިކަމަށް ބޭނުންވާ ޤާނޫނީ އިޞްލާޙުތައް ތަޢާރަފް ކުރުމަށް ޗައިނާއިން ވިސްނަނީ، ޗައިނާގެ އިސްތިޤްލާލާއި މިނިވަންކަމަށް ބޮޑެތި ގޮންޖެހުންތަކެއް ކުރިމަތިވާން ހުރުމުން ކަމަށް ވެސް މަސްއޫލުވެރިން ވިދާޅުވެއެވެ.
މިއީ، ޗައިނާގެ ޕީޕަލްސް ލިބަރޭޝަން އާމީއަށް ޒުވާނުން ރިކްރޫޓް ކުރުމުގެ މަސައްކަތުގައި މިހާރު ކުރިމަތިވާ ދަތިތައް ޙައްލު ކުރުމަށް އެހީތެރި ވެދޭނެ ކަމެއް ކަމުގައި މަސްއޫލުވެރިން ދެކެއެވެ.
ޒަމާނުއްސުރެން ޗައިނާއަކީ ކޮންމެ ދެމަފިރިއަކަށް އެންމެ ދަރިއަކު ހޯދުމަށް ޤާނޫނުން މަޖުބޫރު ކުރި ޤައުމެކެވެ. އެހެންވެ، ދެމަފިރިންގެ އެންމެ ދަރިފުޅު ސިފައިންގެ ފައުޖަށް ވެއްދުމަށް މީހުން ފަސްޖެހެއެވެ. އަދި އާއިލާގެ ހަމައެކަނި ދަރިފުޅަކީ، އިންތިހާއަށް އަޅާލުމާއި ލޯތްބާއި އެކު ތަރުބިއްޔަތު ކޮށްފައިވާ ކުއްޖާކަމަށް ވުމުން، ނަފްސާނީ ގޮތުންނާއި ޖިސްމާނީ ގޮތުން ނާޒުކު ކުއްޖަކަށް، އެ ދަރިފުޅު ވެދެއެވެ. އެކަމުގެ ސަބަބުން ސިފައިންގެ ވަޒީފާއަށް ވަންނަން ބޭނުންވާ ޒުވާނުން ހޯދުމުގައި ދަތިތަކެއް ކުރިމަތިވެފައިވެއެވެ. މިކަން ޙައްލު ކުރުމަށްޓަކައި ގެނެވޭ ބަދަލުތަކުގެ ތެރޭގައި ސިފައިންގެ ޚިދުމަތަކީ މަޖުބުރު ޚިދުމަތަކަށް ހެދޭނެއެވެ.
މިހާރު ހުށަހަޅާފައިވާ ބަދަލުތަކަށް ބަލާއިރު، ކޮލެޖްތަކާއި ޔުނިވާސިޓީތަކާއި ހައި ސްކޫލްތަކާއި ތަޢުލީމީ މުއައްސަސާތަކުގައި ޕީޕަލްސް ލިބަރޭޝަން އާމީގެ ޔުނިޓްތައް ގާއިމް ކުރާނެއެވެ. މި މަސައްކަތުގެ މަޤްޞަދަކީ، ހުނަރުވރި އެކަށީގެންވާ ޒުވާނުން ސިފައިންގެ ތެރެއަށް ވެއްދުމަށް އެމީހުން ތައްޔާރުކޮށް، އަސްކަރީ ތަޢުލީމާއި ފިޒިކަލް އެޑިއުކޭޝަންގެ ޕްރޮގްރާމުތައް ފުރިހަމަ ކުރުމަށް މުއައްސަސާތަކަށް އެހީތެރިވެ ދިނުމެވެ.
މި ޕްރޮގްރާމާ ބެހޭ ގޮތުން މީޑިއާގައި ރިޕޯޓްކޮށްފައިވަނީ ޗައިނާ ނޫސް އެޖެންސީ ޒިންހުއާ އިން ސެޕްޓެމްބަރު މަހުގެ 10 ވަނަ ދުވަހު އެވެ.
