ދުނިޔެ ނާމާންވެ، ރަޝިޔާގެ އިސްތިޤްލާލަށް ނުރައްކަ ވަމުން ދިއުމާ ގުޅިގެން ރަޝިޔާއިން ދިފާޢީ ހޭދަ އިތުރު ކުރުމަށް ނިންމައިފިއެވެ. ރަޝިޔާގެ އަންނަ އަހަރުގެ ބަޖެޓާ ބެހޭ ލިޔުންތައް ދައްކާ ގޮތުން، ބަޖެޓްގެ ދިފާޢީ ހޭދަ 23 އިންސައްތައަށް އިތުރުވެގެން ދާނެއެވެ. މި ތުރު ވުމާއެކު، ރަޝިޔާގެ ދިފާޢީ ބަޖެޓު 145 ބިލިއަން ޑޮލަރަށް އިތުރުވެގެން ދާނެއެވެ.
ރަޝިޔާއިން ދިފާޢީ ހޭދައަށް ކުރާ ހޭދައަކީ، އެޤައުމުގެ ތަޢުލީމާއި، ސިއްޙީ ފަރުވާއާއި، އިޖްތިމާޢީ ސިޔާސަތުތަކަށް ކުރާ ޖުމުލަ ހޭދަ އެއްކޮށްލުމުން ޖެހޭ މިންވަރަށް ވުރެން ބޮޑު ޢަދަދެކެވެ.
ޤައުމީ އުފެއްދުންތެރިކަމުގެ ނިސްބަތުން ޤައުމުތަކުން އަސްކަރީ ހޭދަ ކުރާ މިންވަރު
ރަޝިޔާގެ ނޫސް ދަ ބެލް އިން ރިޕޯޓުކޮށްފައިވާ ގޮތުން މޮސްކޯއިން ދަނީ ކުރިމަތިވެދާނެ ނުރައްކަލަކުން ދިފާޢު ވުމަށް ހަނގުރާމައަށް ތައްޔާރު ވަމުންނެވެ. އަދި ޔޫކްރޭންގެ ހަނގުރާމަ ނިމުނު ކަމުގައި ވިއަސް ރަޝިޔާއިން ދިފާއީ ހޭދައަށް އިސްކަން ދޭނެކަމަށް ލަފާ ކުރެވެއެވެ.
ރައީސް ވްލަޑިމިއާ ޕޫޓިން ވަނީ ރަޝިޔާގެ ސިފައިންގެ ތެރެއަށް 180،000 އައު ސިފައިން އިތުރުކުރުމަށްވެސް އަންގަވާފައެވެ. އެ ޢަދަދާއެކު ރަޝިޔާގެ ޖުމުލަ ސިފައިންގެ ޢަދަދު، 1.5 މިލިއަނަށް އިތުރުވެގެން ދާނެއެވެ. މި އިތުރުވުމާއެކު ރަޝިޔާ ވެގެންދާނީ، ޗައިނާއަށް ފަހު ދުނިޔޭގެ ދެވަނައަށް އެންމެ ބޮޑު ފައުޖަށެވެ.
