އެމެރިކާއިން ފޯރުކޮށްދީފައިވާ ހަތިޔާރު ބޭނުން ކޮށްގެން ސަހްޔޫނީ އިޒްރޭލުން ޢަރަބި އިސްލާމީ ޤައުމެއް ކަމަށްވާ ލުބްނާނަށް އެއްގަމާއި ވައިގެ މަގުން ރޭ އަރައިގަނެފިއެވެ.
ލުބްނާނުގެ ވެރިރަށް ބެއިރޫތާއި އެހެނިހެންވެސް ބައެއް ސަރަހައްދުތަކަށް ސަހްޔޫނީ އިޒްރޭލުން ވައިގެ ހަމަލާތައް ދީފައިވާއިރު، 100،000 އެއްހައި އެއްގަމު ސިފައިން ލުބްނާނުގެ ބޯޑަރު ތެރެއިން ބަރުހަތިޔާރާއެކު ވަދެގަނެފައިވާ ކަމަށް އަލްޖަޒީރާއިން ބުނެއެވެ. އިޒްރޭލާ ކުރިމަތިލުމަށް ލުބްނާނުގެ ސިފައިން ތައްޔާރަށް ތިބި ކަމަށް ބައެއް ރިޕޯޓުތައް ރޭ ބުނިނަމަވެސް ލުބްނާނު ސިފައިން އިޒްރޭލުގެ ފައުޖުތަކާ ކުރިމަތިލަމުންދާކަން އެއްވެސް މީޑިޔާއަކުން އަދި ލުބްނާނު ސިފައިންގެ ފަރާތުންވެސް މިހާތަނަށް ކަށަވަރު ކޮށްދީފައެއް ނުވެއެވެ.
ލުބްނާނު ދިފާއު ކުރުމަށް ސަހްޔޫނީ ބާރުތަކާ ހަނގުރާމަ ކުރަމުން ދަނީ ލުބްނާނުގައި ހަރަކާތްތެރިވާ ހިޒްބުﷲ ޖަމާއަތުންނެވެ. އެ ޖަމައާތުގެ ނައިބް ލީޑަރު ޝެއިޚް ނައީމް ޤައްސެމް ވިދާޅުވެފައިވާ ގޮތަށް އެ ޖަމާއަތުގެ މުޖާހިދުން ސަހްޔޫނީ އިޒްރޭލުގެ ފައުޖުތަކާ ދެކޮޅަށް ހަނގުރާމަ ކުރަމުން އަންނަ ކަމަށް ހިޒްބުﷲއިން ބުނެއެވެ.
އަލްޖަޒީރާއިން ބުނާ ގޮތުގައި އިޒްރޭލުގެ ޖެޓްތަކުން ބެއިރޫތަށް ހަމަލާދީ، ފަލަސްތީނު މުޖާހިދުންގެ ލީޑަރެއް ކަމުގައިވާ މުނީރު އަލް މަޤްދާ ޝަހީދު ކޮށްލަން ހިންގަން އޮޕަރޭޝަނަކުން އޭނާ ވަނީ ސަލާމަތްވެ ވަޑައިގެންފައެވެ. އެކަމަކު މި ހަމަލާގައި އަލް މަޤްދާގެ ދަރިކަލުން ހަސަން މަޤްދާ ވަނީ ޝަހީދުވެފައެވެ.
އިޒްރޭލުގެ ޖެޓްތަކުން ރޭ ވަނީ ސީރިޔާގެ ވެރިރަށް ދިމިޝްގަށްވެސް ހަމަލާ ދީފައެވެ. މި ހަމަލާތަކުގައި 3 މީހުން ޝަހީދުވި ކަމަށް ސީރިޔާގެ އޮފިޝަލުން ވިދާޅުވެއެވެ.
